ഉള്ള്യേരി ബ്രാഞ്ച് പോസ്റ്റ്ഓഫിസ് നാളെ മുതല്‍ സബ് പോസ്റ്റ് ഓഫിസ്

ഉള്ള്യേരി: വര്‍ഷങ്ങള്‍ നീണ്ട കാത്തിരിപ്പിനൊടുവില്‍ ഉള്ള്യേരിയിലെ തപാല്‍ ഓഫിസിന് ശാപമോക്ഷം. 40 വര്‍ഷത്തിലധികമായി ടൗണ്‍ ജങ്ഷനിലെ പഴയ കെട്ടിടത്തിലെ ഇടുങ്ങിയ പീടികമുറിയില്‍ പ്രവര്‍ത്തിച്ച ഓഫിസ് ബുധനാഴ്ച മുതല്‍ പേരാമ്പ്ര റോഡില്‍ പഴയ സിനിമ ഹാളിന് സമീപത്തെ കെട്ടിടത്തിലേക്ക് മാറും. പോസ്റ്റ് ഓഫിസിന്‍െറ പദവി ഉയര്‍ത്തിയെങ്കിലും തെരഞ്ഞെടുപ്പായതിനാല്‍ ഒൗദ്യോഗിക ഉദ്ഘാടനം ഉണ്ടാവില്ല. നിലവില്‍ ഇവിടെ ഒരു പോസ്റ്റ്മാസ്റ്റര്‍, രണ്ടു ഡെലിവറി സ്റ്റാഫ് എന്നിവരാണുള്ളത്. ഇനിമുതല്‍ ബ്രാഞ്ച് പോസ്റ്റ് മാസ്റ്റര്‍ക്ക് പകരം സബ് പോസ്റ്റ് മാസ്റ്ററും നിലവിലെ രണ്ടു ഡെലിവറി സ്റ്റാഫും പുതുതായി ഒരു പാക്കറും ഉണ്ടാകും. ഭാവിയില്‍ ഡെലിവറി സ്റ്റാഫിന്‍െറ എണ്ണം കൂട്ടാനും സാധ്യതയുണ്ട്. 12 മണി വരെ പ്രവര്‍ത്തിച്ചിരുന്ന ഓഫിസ് ഇനി മൂന്നു വരെ പ്രവര്‍ത്തിക്കും. കൂടാതെ, പാഴ്സല്‍ അയക്കാനും നേരിട്ട് എസ്.ബി അക്കൗണ്ടുകള്‍ എടുക്കാനും കഴിയും. സ്വന്തമായി പിന്‍കോഡും ഉണ്ടാവും. സബ് തപാല്‍ ഓഫിസായി മാറിയതോടെ കുന്നത്തറ, കക്കഞ്ചേരി, ഒറവില്‍, മൊടക്കല്ലൂര്‍ ബ്രാഞ്ച് ഓഫിസുകളും ഇതിനു കീഴില്‍ വരും. ഉള്ള്യേരി പോസ്റ്റ് ഓഫിസിന്‍െറ പദവി ഉയര്‍ത്തണമെന്നും സ്ഥലപരിമിതിയില്‍ വീര്‍പ്പുമുട്ടുന്ന കെട്ടിടത്തില്‍നിന്ന് മാറ്റണമെന്നും ജനങ്ങള്‍ ദീര്‍ഘകാലമായി ആവശ്യമുന്നയിച്ചിരുന്നു.