വ്യാജ ഡോക്ടര്‍ റിമാന്‍ഡില്‍; പിന്നില്‍ രാഷ്ട്രീയക്കളിയെന്ന്

മുക്കം: പൈല്‍സ് ഉള്‍പ്പെടെയുള്ള രോഗങ്ങള്‍ക്ക് ചികിത്സ നടത്തിയതിന് പൊലീസ് പിടികൂടിയ വ്യാജ ഡോക്ടറെ കോടതി റിമാന്‍ഡ് ചെയ്തു. വര്‍ഷങ്ങളായി മുക്കത്ത് ചികിത്സനടത്തി വരുന്ന ബ്രിഷ്യന്‍ കുമാര്‍ എന്നയാളെ കഴിഞ്ഞദിവസമാണ് ബസ്സ്റ്റാന്‍ഡ് പരിസരത്തെ ഇയാളുടെ ക്ളിനിക്കില്‍നിന്ന് മുക്കം പൊലീസ് അറസ്റ്റ് ചെയ്തത്. അതേസമയം അറസ്റ്റുമായി ബന്ധപ്പെട്ട് വിവാദങ്ങളും കൊഴുക്കുകയാണ്. 
തദ്ദേശ തെരഞ്ഞെടുപ്പില്‍ ഇടതുമുന്നണിക്കായി വോട്ട് ചെയ്തതാണ് പെട്ടന്നുള്ള അറസ്റ്റിന് കാരണമെന്നാണ് പറയപ്പെടുന്നത്. 
25 വര്‍ഷത്തോളമായി പശ്ചിമബംഗാള്‍ സ്വദേശിയായ  ഇയാള്‍ മുക്കം കുറ്റിപ്പാലക്കലില്‍ കുടുംബസമേതം താമസിച്ചുവരികയാണ്. മുക്കം മുനിസിപ്പാലിറ്റിയിലെ 14ാം ഡിവിഷനില്‍ ഇത്തവണ വോട്ടും ചെയ്തു. പൈല്‍സിനുള്ള  ബംഗാളിലെ നാട്ടുചികിത്സയാണ് ഇയാള്‍ നല്‍കുന്നതെന്നാണ് അറിയാന്‍കഴിഞ്ഞത്. വര്‍ഷങ്ങളായി ചികിത്സാരംഗത്തുള്ള ഇയാള്‍ക്കെതിരെ എന്തുകൊണ്ട് ഇതുവരെ നടപടിയെടുത്തില്ളെന്നാണ് ഒരുവിഭാഗം ചോദിക്കുന്നത്. ഇയാള്‍ ക്ളിനിക്കിലെ ഫാര്‍മസിസ്റ്റാണന്നും ഒരു ഹോമിയോ ഡോക്ടര്‍ ഇവിടെ ചികിത്സ നടത്തി വരുന്നുണ്ടെന്നും പറയപ്പെടുന്നു. 
ഇതിനെല്ലാം പുറമെ മുക്കത്തും പരിസരപ്രദേശങ്ങളിലും നിരവധി ഇത്തരം ചികിത്സകരുണ്ടെന്നും ഇവര്‍ക്കെതിരെ എന്ത് കൊണ്ട് നടപടിയെടുക്കുന്നില്ളെന്നും ചോദ്യമുയര്‍ന്നിട്ടുണ്ട്.