വൈദ്യുതി കണക്ഷന്‍ ലഭിച്ചില്ല; കുറ്റ്യാടി പുതിയ ബസ്സ്റ്റാന്‍ഡ് അടഞ്ഞുതന്നെ

കുറ്റ്യാടി: ഉദ്ഘാടനംചെയ്ത് രണ്ടരമാസമായിട്ടും കുറ്റ്യാടി ബസ്സ്റ്റാന്‍ഡ് അടഞ്ഞുതന്നെ. ഒക്ടോബര്‍ ഒമ്പതിന് മുഖ്യമന്ത്രി ഉദ്ഘാടനംചെയ്ത സ്റ്റാന്‍ഡില്‍നിന്ന് മുല്ലപ്പള്ളി രാമചന്ദ്രന്‍ എം.പി ബസ്സര്‍വിസും ഉദ്ഘാടനം ചെയ്തു. പഞ്ചായത്ത് തെരഞ്ഞെടുപ്പ് മുന്നില്‍ക്കണ്ടാണ് മുന്‍ ഗ്രാമപഞ്ചായത്ത് ഭരണസമിതി പണികള്‍ പൂര്‍ത്തിയാക്കാതെ ഉദ്ഘാടനം സംഘടിപ്പിച്ചത്. ഇതുവരെയും ബസുകള്‍ ഓടിത്തുടങ്ങിയിട്ടില്ല. സ്റ്റാന്‍ഡ് അടഞ്ഞുകിടപ്പാണ്. ഉദ്ഘാടനം കഴിഞ്ഞാണ് സോളിങ്ങും കിണര്‍നിര്‍മാണവും നടത്തിയത്. എന്നാല്‍, വൈദ്യുതി കണക്ഷന്‍ കിട്ടാത്തതാണ് സ്റ്റാന്‍ഡ് പ്രവര്‍ത്തനം തുടങ്ങുന്നതിന് പ്രധാന തടസ്സമെന്ന് പഞ്ചായത്ത് പ്രസിഡന്‍റ് സി.എന്‍. ബാലകൃഷ്ണന്‍ പറഞ്ഞു. കണക്ഷന്‍ ലഭിക്കാന്‍ പ്രത്യേകം ട്രാന്‍സ്ഫോര്‍മറും വെക്കണം. കെ.എസ്.ഇ.ബി അധികൃതര്‍ എസ്റ്റിമേറ്റ് തയാറാക്കിയിട്ടുണ്ട്. നിലവിലെ സ്റ്റാന്‍ഡില്‍ സ്ഥലപരിമിതിമൂലം ബസുകളെ ഉള്‍ക്കൊള്ളാന്‍ കഴിയാത്ത സ്ഥിതിയാണ്. വടകര റോഡിലെ ഗതാഗത കുരുക്കിനുകാരണം ഈ സ്റ്റാന്‍ഡാണ്. പുതിയസ്റ്റാന്‍ഡ് തുറക്കുന്നതോടെ ഈ പ്രശ്നത്തിന് ഒരുപരിധിവരെ പരിഹാരമാവുകയും ചെയ്യും.