കുറ്റ്യാടി ആക്രമണം: രണ്ട് പ്രധാന പ്രതികള്‍ കൂടി അറസ്റ്റില്‍

കുറ്റ്യാടി: എസ്.ഡി.പി.ഐ പ്രവര്‍ത്തകനും വ്യാപാരിയുമായ ചെറിയകുമ്പളം ആര്‍.എം.നിസാറിനെ കടയില്‍ കയറി വെട്ടിയും ബോംബെറിഞ്ഞും കൊല്ലാന്‍ശ്രമിച്ച കേസില്‍ അവശേഷിച്ച രണ്ട് പ്രധാന പ്രതികള്‍ കൂടി അറസ്റ്റില്‍. വാണിമേല്‍ വെട്ടുകാട്ടില്‍ റിനു എന്ന റിന്‍സന്‍ (28), വളയം കുറുവന്തേരി പടിക്കല്‍ രാജന്‍ (50) എന്നിവരെയാണ് കുറ്റ്യാടി സി.ഐ എം.സി. കുഞ്ഞിമോയിന്‍കുട്ടിയും സംഘവും അറസ്റ്റ് ചെയ്തത്. നാദാപുരം ഫസ്റ്റ് ക്ളാസ് മജിസ്ട്രേറ്റ് കോടതിയില്‍ ഹാജരാക്കിയ ഇരുവരെയും റിമാന്‍ഡ് ചെയ്തു. കഴിഞ്ഞ മാസം 13ന് നടന്ന ആക്രമണത്തില്‍ ഇരുവരും പങ്കെടുത്തിരുന്നതായി പൊലീസ് പറഞ്ഞു. ഇതോടെ ഈ കേസില്‍ നേരിട്ട് പങ്കെടുത്ത ഏഴു പ്രതികളും അറസ്റ്റിലായി. ബോംബുകള്‍ കൊണ്ടുവന്നതും എറിഞ്ഞതും റിനുവാണെന്നും ചീള് തെറിച്ച് ഇയാളുടെ കൈക്ക് പരിക്കേറ്റിരുന്നതായും പറഞ്ഞു. ആക്രമണ ശേഷം മോട്ടോര്‍ ബൈക്കില്‍ രക്ഷപ്പെട്ട് വാണിമേല്‍ കൂളിക്കുന്നിലെ വീട്ടില്‍ പരിക്കുകളോടെ കയറിയ മൂന്നംഘ സംഘത്തില്‍ റിനുവും ഉണ്ടായിരുന്നു. അടുത്തിടെ അറസ്റ്റിലായ അഭിലാഷ്, നാണു എന്നിവരാണ് ഒപ്പമുണ്ടായിരുന്നത്. റിനുവിന്‍െറ ബന്ധുവീടാണിത്. പ്രതികള്‍ക്ക് അഭയം നല്‍കിയതിനും തെളിവുകള്‍ നശിപ്പിച്ചതിനും വീട്ടുടമയെയും ഭാര്യയെയും അറസ്റ്റ് ചെയ്തിരുന്നു. മോട്ടോര്‍ ബൈക്ക് ഓടിച്ചുവന്നതും തിരിച്ചുകൊണ്ടു പോയതും റിനുവാണെന്നും പൊലീസ് പറഞ്ഞു. എന്നാല്‍, ബൈക്ക് കിട്ടിയോ എന്ന കാര്യം പൊലീസ് വെളിപ്പെടുത്തിയിട്ടില്ല. ആന്ധ്രയില്‍ ഹോട്ടല്‍ തൊഴിലാളിയായ റിനു സംഭവത്തിനു ശേഷം തിരിച്ചുപോയി. വീണ്ടും നാട്ടില്‍ വന്നപ്പോഴാണ് പിടിയിലായത്. ബുധനാഴ്ച അറസ്റ്റിലായ രാജന്‍ റിമാന്‍ഡില്‍ കഴിയുന്ന അനൂപിനും അഖിനും ഒപ്പമാണ് ആക്രമണത്തിന് ശേഷം ബൈക്കില്‍ രക്ഷപ്പെട്ടത്. ആക്രമണത്തിനു ശേഷം മൂന്ന് വീതം പ്രതികള്‍ രണ്ട് മോട്ടോര്‍ ബൈക്കുകളിലായി രക്ഷപ്പെടുകയായിരുന്നു. ഈ രണ്ടു ബൈക്കുകളുടെ കൂടുതല്‍ വിവരങ്ങള്‍ പൊലീസ് വെളിപ്പെടുത്തിയിട്ടില്ല. കൂടാതെ മൂന്നാമതൊരു ബൈക്കുണ്ടായിരുന്നത് സ്റ്റാര്‍ട്ടാവാത്തതിനാല്‍ സ്ഥലത്ത് ഉപേക്ഷിച്ചു. അത് കസ്റ്റഡിയിലാണുള്ളത്. പ്രതികള്‍ പരിക്കേറ്റ് വീട്ടില്‍ അഭയം തേടിയതും ഒരു ബൈക്ക് സ്ഥലത്ത് ഉപേക്ഷിക്കേണ്ടി വന്നതുമാണ് കേസ് അന്വേഷണത്തിന് വേഗം തുമ്പാകാന്‍ ഇടയാക്കിയതെന്ന് പൊലീസ് പറഞ്ഞു. ബൈക്കില്‍ രക്ഷപ്പെടുകയായിരുന്ന പ്രതികളുടെ പിന്നാലെ രണ്ട് ജീപ്പുകളിലായി പൊലീസ് പിന്തുടര്‍ന്നിരുന്നെങ്കിലും തലനാരിഴക്ക് രക്ഷപ്പെടുകയായിരുന്നു. ആക്രമണത്തില്‍ നേരിട്ടു പങ്കെടുത്ത വളയം ചെറുമോത്ത് മനീഷ്, കല്ലാച്ചി പയന്തോങ്ങ് അഖിന്‍, ചെക്യാട് അന്ത്യേരി അനൂപ്, ചെക്യാട് നാണു,കല്ലാച്ചി വരിക്കോളി അഭിലാഷ് എന്നിവരും ബൈക്ക് മോഷ്ടിച്ച് എത്തിച്ചു കൊടുത്ത കുറ്റിക്കാട്ടൂര്‍ വൈശാഖ്, വീട്ടുടമ സനീഷ് എന്നിവരും റിമാന്‍ഡിലാണ്. അറസ്റ്റിലായ വീട്ടുടമയുടെ ഭാര്യ ഷൈനി, പ്രതികളെ ആശുപത്രിയിലത്തെിച്ച ടാക്സി ജീപ്പ് ഡ്രൈവര്‍ സജീവന്‍ എന്നിവര്‍ക്ക് ജാമ്യം ലഭിച്ചിരുന്നു. ഇനി കേസിന്‍െറ ഗൂഢാലോചനയില്‍ പങ്കെടുത്തവരെ പിടികൂടാ നുണ്ട്.