എരഞ്ഞിപ്പാലത്തെ താമരക്കുളം വീണ്ടും നികത്താന്‍ ശ്രമം

കോഴിക്കോട്: എരഞ്ഞിപ്പാലത്തെ താമരക്കുളം വീണ്ടും മണ്ണിട്ടുനികത്താന്‍ ശ്രമം. കഴിഞ്ഞ ദിവസം രാത്രിയാണ് ടിപ്പറുകളില്‍ മണ്ണ് തള്ളിയത്. പതിറ്റാണ്ടുകള്‍ പഴക്കമുള്ള കുളം നികത്തുന്നതിനെതിരെ പ്രദേശത്തുകാര്‍ക്കുള്ള എതിര്‍പ്പ് അവഗണിച്ചാണ് വീണ്ടും മണ്ണ് നിക്ഷേപിച്ചത്. വര്‍ഷങ്ങള്‍ക്കുമുമ്പ് കുളിക്കാനും മറ്റും ഉപയോഗിച്ചിരുന്ന കുളമാണിത്. ഉപയോഗശൂന്യമാണെങ്കിലും വേനല്‍ക്കാലത്തുപോലും വറ്റില്ളെന്നതാണ് കുളത്തിന്‍െറ സവിശേഷത. നേരത്തേ കുളം നികത്താന്‍ ശ്രമിച്ചെങ്കിലും നാട്ടുകാരുടെ എതിര്‍പ്പ് കാരണം കുറെ കാലത്തേക്ക് നടന്നില്ല. കുളം സംരക്ഷിക്കണമെന്നാവശ്യപ്പെട്ട് പ്രദേശവാസികള്‍ കലക്ടര്‍ക്ക് നിവേദനം നല്‍കി. തഹസില്‍ദാര്‍ രോഷ്നി നാരായണന്‍ പ്രദേശം സന്ദര്‍ശിച്ചു. മണ്ണ് നീക്കാന്‍ നടപടിയെടുക്കുമെന്ന് ഇവര്‍ പറഞ്ഞു.