നഗരവാസികള്‍ക്ക് നവ്യാനുഭവം പകരാന്‍ കാട്ടുനായ്ക്ക കലാകാരന്മാര്‍

കോഴിക്കോട്: നഗരവാസികള്‍ക്ക് നവ്യാനുഭവം പകരാന്‍ ആദിവാസി ഗോത്രങ്ങളിലെ അപൂര്‍വ നൃത്തങ്ങളുടെ പ്രദര്‍ശനത്തിനുള്ള പരിശീലനത്തിലാണ് കാട്ടുനായ്ക്ക വിഭാഗത്തിലെ കലാകാരന്മാര്‍. വയനാട്, പാലക്കാട് ജില്ലകളിലായി വസിക്കുന്ന കാട്ടുനായ്ക്ക സമുദായത്തിന്‍െറ കോല്‍ക്കളി, വട്ടക്കളി, സോദിമ്മി തുടങ്ങിയ നൃത്തരൂപങ്ങളവതരിപ്പിക്കുന്ന ഗോത്രകലാകാരന്മാരാണ് പ്രദര്‍ശനത്തിനായി നഗരത്തില്‍ പരിശീലനത്തിലേര്‍പ്പെട്ടിരിക്കുന്നത്. മണ്‍മറഞ്ഞുപോയ്ക്കൊണ്ടിരിക്കുന്ന ഗോത്ര നൃത്തരൂപങ്ങള്‍ പുതുതലമുറയിലത്തെിക്കുക എന്ന ലക്ഷ്യത്തോടെ ചേവായൂര്‍ കിര്‍താഡ്സ് വകുപ്പിലെ ആദികലാകേന്ദ്രത്തിലാണ് പഠനക്കളരി ആരംഭിച്ചത്. പുരുഷന്മാര്‍ മാത്രം കളിക്കുന്ന കോല്‍ക്കളി, പെണ്‍കുട്ടി ഋതുമതി ആകുമ്പോള്‍ സ്ത്രീകള്‍ മാത്രം കളിക്കുന്ന വട്ടംകളി, വേട്ടക്കിറങ്ങുമ്പോള്‍ കളിക്കുന്ന സോദിമ്മി തുടങ്ങിയ തനത് കലാരൂപങ്ങളും ഗോത്ര ഊരുകളില്‍ മാത്രം കേള്‍ക്കുന്ന പാട്ടുകളും കാട്ടുനായ്ക്ക സമുദായക്കാര്‍ക്കിടയിലുണ്ട്. നൃത്തവാദ്യങ്ങളില്‍ അറിവും കഴിവുമുള്ള പഴയ തലമുറയുടെ അഭാവവും പുതിയ തലമുറയുടെ താല്‍പര്യക്കുറവും ഗോത്രകലകളുടെ നാശത്തിനിടയാക്കുന്നു. ആദിവാസി ഊരുകളില്‍ മാത്രം നിലനില്‍ക്കുകയും മറ്റു ജനങ്ങള്‍ക്ക് അന്യമാവുകയും ചെയ്യുന്ന ഇത്തരം കലാരൂപങ്ങളെ പുതുതലമുറക്ക് പകര്‍ന്നുനല്‍കുന്നതിനുള്ള പഠനക്കളരിയാണ് കലാകേന്ദ്രത്തില്‍ സംഘടിപ്പിച്ചിരിക്കുന്നത്. 9 സ്ത്രീകളും 16 പുരുഷന്മാരുമാണ് പരിശീലനത്തില്‍ പങ്കെടുക്കുന്നത്. പരിശീലനം 15 വരെ തുടരും. 15ന് വൈകീട്ട് നഗരവാസികള്‍ക്കായി പ്രത്യേക പ്രദര്‍ശനവുമുണ്ടാവും.