‘സ്ത്രീസൗഹൃദ ഓട്ടോറിക്ഷ’ നിര്‍ദേശത്തിനെതിരെ ഓട്ടോ ഡ്രൈവര്‍മാര്‍

കോഴിക്കോട്: നഗരത്തില്‍ ഓട്ടോത്തൊഴിലാളികളില്‍ കുറച്ചുപേരെ തെരഞ്ഞെടുത്ത് ‘സ്ത്രീസൗഹൃദ ഓട്ടോറിക്ഷ’ എന്ന സ്റ്റിക്കര്‍ പതിച്ച് ഓടിക്കണമെന്ന നിര്‍ദേശത്തിനെതിരെ ഓട്ടോ ഡ്രൈവര്‍മാര്‍. നിര്‍ദേശം ഓട്ടോഡ്രൈവര്‍മാര്‍ക്കിടയില്‍ രണ്ടുതരം പൗരന്മാരെ സൃഷ്ടിക്കലാണെന്ന് സിറ്റി ഓട്ടോഡ്രൈവേഴ്സ് കോഓഡിനേഷന്‍ കമ്മിറ്റി ആരോപിച്ചു. കുറച്ചു തൊഴിലാളികള്‍ സ്റ്റിക്കര്‍ പതിച്ച് സ്ത്രീസൗഹൃദക്കാരും മറ്റുള്ളവര്‍ മോശക്കാരായും ചിത്രീകരിക്കപ്പെടുമെന്നുള്ളതിനാല്‍ കോഴിക്കോട് നഗരത്തില്‍ ഈ പരിഷ്കാരം നടപ്പാക്കാനുള്ള തീരുമാനം പിന്‍വലിക്കണമെന്ന് കോഓഡിനേഷന്‍ കമ്മിറ്റി പൊലീസ് അധികൃതരോട് ആവശ്യപ്പെട്ടു. സി.സി പെര്‍മിറ്റ് ഇല്ലാതെ അനധികൃതമായി നഗരത്തില്‍ ഓടുന്ന ഓട്ടോറിക്ഷകളെ തടയുകയും കേസെടുക്കുകയും ചെയ്യുക, പ്രധാനസ്ഥലങ്ങളില്‍ പാര്‍ക്കിങ് ബോര്‍ഡുകള്‍ സ്ഥാപിക്കുക തുടങ്ങിയവ അടിയന്തരമായി നടപ്പാക്കണമെന്നും ആവശ്യപ്പെട്ടു. വാസുദേവന്‍ (ബി.എം.എസ്) അധ്യക്ഷത വഹിച്ചു. കണ്‍വീനര്‍ എ. മമ്മദ്കോയ റിപ്പോര്‍ട്ട് അവതരിപ്പിച്ചു. വിവിധ സംഘടനകളെ പ്രതിനിധാനംചെയ്ത് യു. സതീശന്‍, പി. ഗോപിനാഥ് (എ.ഐ.ടി.യു.സി), എം. പ്രകാശന്‍ (ഐ.എന്‍.ടി.യു.സി), അബ്ബാസ് (ഐ.എന്‍.എല്‍), ടി.വി. നൗഷാദ്, കെ. മോഹനന്‍ (സി.ഐ.ടി.യു), അബൂബക്കര്‍, ഗഫൂര്‍ (എസ്.ടി.യു), ഗോപാലകൃഷ്ണന്‍ (കെ.ടി.യു.സി.ബി), മുസമ്മല്‍ അഷറഫ് (എച്ച്.എം.എസ്) എന്നിവര്‍ സംസാരിച്ചു.