കുറ്റ്യാടി ആക്രമണക്കേസ്; പ്രധാന പ്രതികൂടി അറസ്റ്റില്‍

കുറ്റ്യാടി: ടൗണിലെ വ്യാപാരി ആര്‍.എം. നിസാറിനെ കടയില്‍ കയറി വെട്ടിയ കേസില്‍ ഒരു പ്രധാനപ്രതി കൂടി അറസ്റ്റില്‍. ചെക്യാട് അന്ത്യേരി അനൂപെന്ന കണ്ണനെയാണ് (26) കുറ്റ്യാടി സി.ഐ എം.സി. കുഞ്ഞിമോയിന്‍കുട്ടി വളയത്തുനിന്ന് അറസ്റ്റ് ചെയ്തത്. നവംബര്‍ 13ന് നിസാറിനെ കടയില്‍കയറി വെട്ടിയകൂട്ടത്തില്‍ അനൂപും ഉണ്ടായിരുന്നെന്ന് സി.ഐ പറഞ്ഞു. ചെങ്കല്ല് ലോഡിങ് തൊഴിലാളിയായ ഇയാള്‍ അക്രമസമയത്ത് ധരിച്ച വസ്ത്രങ്ങള്‍ വീട്ടിനടുത്തുള്ള ഉപയോഗശൂന്യമായ കിണറ്റില്‍ ഉപേക്ഷിച്ചത് പൊലീസ് കണ്ടെടുത്തു. അനൂപിന് പരിക്കുകളൊന്നും ഉണ്ടായിരുന്നില്ലത്രെ. സംഭവത്തിനുശേഷം മൂന്നുപേരോടൊപ്പം ബൈക്കില്‍ രക്ഷപ്പെടുകയായിരുന്നു. പ്രതികള്‍ ഉപേക്ഷിച്ച രണ്ട് കൊടുവാള്‍ നിസാറിന്‍െറ കടക്കകത്തുനിന്നും മറ്റൊന്ന് മുള്ളമ്പത്തുനിന്നും പൊലീസ് കണ്ടെടുത്തിരുന്നു. ഇനിയും ആയുധങ്ങള്‍ ഉണ്ടെന്നാണ് സൂചന. ഇയാളോടൊപ്പം ബൈക്കില്‍ രക്ഷപ്പെട്ട രണ്ടുപേരില്‍ കല്ലാച്ചി പയന്തോങ് അഖിനെ നേരത്തെ അറസ്റ്റ് ചെയ്തിരുന്നു. ഒരാളെക്കൂടി അറസ്റ്റ് ചെയ്യാനുണ്ട്. സംഭവത്തിനുശേഷം പരിക്കുകളോടെ മറ്റൊരു ബൈക്കില്‍ രക്ഷപ്പെട്ട മൂന്നുപേരെയും അറസ്റ്റ് ചെയ്യാനുണ്ട്. രാജന്‍, നാണു, അഭിലാഷ് എന്നിവരാണ് പ്രതികളെന്നും പറയുന്നു. കൂടുതല്‍വിവരങ്ങള്‍ വെളിപ്പെടുത്തിയിട്ടില്ല. ഉടന്‍ അറസ്റ്റിലാവുമെന്നാണ് പറയുന്നത്. അനൂപിനെ ഞായറാഴ്ച കോടതിയില്‍ ഹാജരാക്കും. ഈ കേസില്‍ ഇതുവരെ ഏഴ് പ്രതികളാണ് അറസ്റ്റിലായത്. ഇതില്‍ അനൂപും, പയന്തോങ് അഖിനും, വളയം മനീഷുമാണ് ആക്രമണത്തില്‍ നേരിട്ട് പങ്കെടുത്തവര്‍. പ്രതികള്‍ക്ക് മോട്ടോര്‍ ബൈക്ക് മോഷ്ടിച്ചുകൊടുത്ത കുറ്റിക്കാട്ടൂര്‍ വൈശാഖ്, പ്രതികള്‍ക്ക് അഭയം നല്‍കിയ ദമ്പതികളായ അനീഷ്, ഷൈനി എന്നിവരും പരിക്കേറ്റ പ്രതികളെ ആശുപത്രിയില്‍ കൊണ്ടുപോയ ടാക്സി ജീപ്പ് ഡ്രൈവര്‍ തുവ്വക്കുന്ന് സജീവന്‍ എന്നിവരാണ് അറസ്റ്റിലായ മറ്റുള്ളവര്‍. വെള്ളിയാഴ്ച അറസ്റ്റ് ചെയ്ത സജീവനെ പൊലീസ് ജാമ്യത്തില്‍വിട്ടു.