മുക്കം നഗരസഭ: സ്റ്റാന്‍ഡിങ് കമ്മിറ്റി അംഗങ്ങളായി

മുക്കം: പ്രഥമ മുക്കം നഗരസഭയില്‍ വിവിധ സ്റ്റാന്‍ഡിങ് കമ്മിറ്റി അംഗങ്ങള്‍ സംബന്ധിച്ച് തീരുമാനമായി. 33 കണ്‍സിലര്‍മാരുള്ള നഗരസഭയില്‍ 22 എല്‍.ഡി.എഫ്, 10 യു.ഡി.എഫ്, ഒരു ബി.ജെ.പി എന്നതാണ് കക്ഷിനില. ചൊവ്വാഴ്ച രാവിലെ നഗരസഭാ കോണ്‍ഫറന്‍സ് ഹാളില്‍ ചേര്‍ന്ന  യോഗത്തിലാണ് അംഗങ്ങളെ തെരഞ്ഞെടുത്തത്.  റിട്ടേണിങ് ഓഫിസര്‍ കെ.എം. സുരേഷ് യോഗം നിയന്ത്രിച്ചു. യോഗ തീരുമാനമനുസരിച്ച് ധനകാര്യ സ്റ്റാന്‍ഡിങ് കമ്മിറ്റിയില്‍ ഡെപ്യൂട്ടി ചെയര്‍പേഴ്സന്‍ ഫരീദാ മോയിന്‍കുട്ടി അധ്യക്ഷയാവും. ഇ.പി. അരവിന്ദന്‍, രജിത കുപ്പോട്ട്, പ്രജിത പ്രദീപ്, അനില്‍കുമാര്‍, സഫിയ മുഹമ്മദ് തുടങ്ങിയവരാണ് അംഗങ്ങള്‍. സാങ്കേതികമായി വ്യാഴാഴ്ചയാണ് ധനകാര്യ കമ്മിറ്റി നിലവില്‍വരുക.  ആരോഗ്യ സ്റ്റാന്‍ഡിങ് കമ്മിറ്റിയില്‍ മിനി കരുണാകരന്‍, സൈനബ കല്ലുരുട്ടിമ്മല്‍, പി. പ്രശോഭ് കുമാര്‍, വി. ഗിരിജ, പ്രഷി എന്നിവരാണ് അംഗങ്ങള്‍. പ്രശോഭ് കുമാര്‍ അധ്യക്ഷനായേക്കും. പി.കെ. മുഹമ്മദ്, സാലി സിബി, ബ്രിജേഷ്, പി.ടി. ബാബു, വി.എം. റഹ്മത്ത് എന്നിവരാണ് പൊതുമരാമത്ത് സ്റ്റാന്‍ഡിങ് കമ്മിറ്റി അംഗങ്ങള്‍. സാലി സിബി പൊതുമരാമത്ത് സ്റ്റാന്‍ഡിങ് കമ്മിറ്റി അധ്യക്ഷയാവും. ജസി, ടി.ടി. സുലൈമാന്‍, വി.ശിവശങ്കരന്‍, ബിന്ദു, കെ.ടി. ശ്രീധരന്‍, സീനത്ത് എന്നിവര്‍ വികസന സ്റ്റാന്‍ഡിങ് കമ്മിറ്റി അംഗങ്ങളാണ്. കെ.ടി. ശ്രീധരന്‍ വികസന സ്റ്റാന്‍ഡിങ് കമ്മിറ്റി അധ്യക്ഷനാവും. ഉഷാകുമാരി, ഷഫീഖ് മാടായി, പി. ലീല, അബ്ദുല്‍ അസീസ്, എ.പി. അബ്ദുല്‍ ഹമീദ് എന്നിവര്‍ ക്ഷേമകാര്യ സ്റ്റാന്‍ഡിങ് കമ്മിറ്റി അംഗങ്ങളാണ്. പി. ലീല ക്ഷേമകാര്യ സ്റ്റാന്‍ഡിങ് കമ്മിറ്റിയുടെ അധ്യക്ഷയാവും. മുക്കം വിജയന്‍, അബ്ദുല്‍ ഗഫൂര്‍, എന്‍. ചന്ദ്രന്‍ മാസ്റ്റര്‍, ശ്രീദേവി ഇരട്ടങ്ങല്‍, ബുഷ്റ എന്നിവര്‍ വിദ്യാഭ്യാസ സ്റ്റാന്‍ഡിങ് കമ്മിറ്റി അംഗങ്ങളാണ്. എന്‍. ചന്ദ്രന്‍ വിദ്യാഭ്യാസ സ്റ്റാന്‍ഡിങ് കമ്മിറ്റിയുടെ അധ്യക്ഷനാവും. അധ്യക്ഷന്മാരുടെ തെരഞ്ഞെടുപ്പ് ഏഴാം തീയതിയാണ് നടക്കുക.