തടവുകാരി രക്ഷപ്പെട്ട സംഭവം: വാര്‍ഡ് ഡ്യൂട്ടിയിലുണ്ടായിരുന്നവരെ ചുമതലയില്‍നിന്ന് മാറ്റി

കോഴിക്കോട്: കുതിരവട്ടം മാനസികാരോഗ്യ കേന്ദ്രത്തില്‍നിന്ന് തടവുകാരി രക്ഷപ്പെട്ടതുമായി ബന്ധപ്പെട്ട് ആദിവസം ഡ്യൂട്ടിയിലുണ്ടായിരുന്ന ജീവനക്കാരെ മറ്റു വാര്‍ഡുകളിലേക്ക് മാറ്റി. ഡ്യൂട്ടിയിലുണ്ടായിരുന്ന ഹെഡ് നഴ്സ്, സ്റ്റാഫ് നഴ്സ്, മൂന്നു നഴ്സിങ് അസിസ്റ്റന്‍റുമാര്‍ എന്നിവരെയാണ് വനിതാ ഫോറന്‍സിക് വാര്‍ഡിന്‍െറ ചുമതലയില്‍നിന്ന് മാറ്റി മറ്റു വാര്‍ഡുകളിലേക്ക് നിയമിച്ചത്. ഡി.എം.ഒ തലത്തില്‍ നടന്ന അന്വേഷണത്തില്‍ ജീവനക്കാര്‍ക്കെതിരെ തെളിവുകളൊന്നും ലഭിച്ചിട്ടില്ളെന്നും ചികിത്സാപരമായ പിഴവുകളൊന്നും സംഭവിച്ചിട്ടില്ളെന്നും ഡി.എം.ഒ നാരായണ നായിക് പറഞ്ഞു. എന്നാല്‍, സുരക്ഷാപാളിച്ചകള്‍ ധാരാളമുണ്ട്. വാര്‍ഡിന് പൊലീസ് സംരക്ഷണം വേണ്ടതായിരുന്നു. പക്ഷേ, അതുണ്ടായില്ല. തടവുകാരിയെ രക്ഷപ്പെടാന്‍ ജീവനക്കാര്‍ സഹായിച്ചോയെന്ന കാര്യവും മറ്റും പൊലീസ് അന്വേഷിക്കുന്നുണ്ട്. ആ റിപ്പോര്‍ട്ട് വന്ന് അതിനടിസ്ഥാനത്തില്‍ മാത്രമേ നടപടിയുണ്ടാകൂ. എന്നാല്‍, ജീവനക്കാരെ മറ്റു വാര്‍ഡുകളിലേക്ക് മാറ്റാന്‍ സൂപ്രണ്ടിനോട് ആവശ്യപ്പെട്ടിട്ടുണ്ടെന്നും അദ്ദേഹം പറഞ്ഞു.