വാഴൂര്‍ മിനി സിവില്‍ സ്​റ്റേഷന്‍ നിര്‍മാണത്തിന് തറക്കല്ലിട്ടു

വാഴൂര്‍: കാഞ്ഞിരപ്പള്ളി നിയോജക മണ്ഡലത്തിലെ മൂന്നാമത്തെ സിവില്‍ സ്റ്റേഷനായ വാഴൂര്‍ മിനി സിവില്‍ സ്റ്റേഷന്‍ നിര്‍മാണത്തിന് തുടക്കമായി. തറക്കല്ലിടൽ ഡോ. എൻ. ജയരാജ് എം.എൽ.എ നിർവഹിച്ചു. പൊതുമരാമത്ത് വകുപ്പ്, വനിത ശിശു ക്ഷേമ വകുപ്പ്, ഐ.സി.ഡി.എസ്, രജിസ്‌ട്രേഷന്‍ വകുപ്പ് എന്നിവയാണ് ആദ്യഘട്ടത്തില്‍ മിനി സിവില്‍ സ്റ്റേഷനിലേക്ക് മാറ്റുക. ദേശീയപാതയുടെ അരികില്‍ അനാഥമായി കിടന്ന 76 സ​െൻറ് പുറമ്പോക്ക് ഭൂമി ഏറ്റെടുത്ത് മൂന്ന് നിലയിലായി 1051 ചതുരശ്രമീറ്റര്‍ വിസ്തൃതിയിലാണ് നിര്‍മാണം. നിലവിലുള്ള കൊടുംവളവ് നിവര്‍ത്തുന്നതിന് ആവശ്യമായ സ്ഥലം ഒഴിവാക്കി തെന്നയാണ് നിര്‍മാണം നടത്തുന്നതെന്നും ഇത് സംബന്ധിച്ച് വിവിധ പഠനങ്ങള്‍ നടത്തിയിട്ടുള്ളതാണെന്നും അദ്ദേഹം വിശദീകരിച്ചു. വാഴൂര്‍ ഗ്രാമപഞ്ചായത്ത് പ്രസിഡൻറ് എസ്. പുഷ്‌കലാദേവി അധ്യക്ഷയായ ചടങ്ങില്‍ ജില്ല പഞ്ചായത്ത് അംഗം സെബാസ്റ്റ്യന്‍ കുളത്തുങ്കല്‍, ബ്ലോക്ക് പഞ്ചായത്ത് അംഗം വിജയകുമാര്‍ എന്നിവര്‍ സംസാരിച്ചു.