കണിക പരീക്ഷണശാല: സർക്കാർ ഇടപെടണമെന്ന്​ റോഷി അഗസ്​റ്റ്യൻ

ഇടുക്കി: തേനിക്ക് സമീപം പെട്ടിപ്പുറത്ത് നിർമാണത്തിന് അനുമതി നൽകിയിട്ടുള്ള കണിക പരീക്ഷണശാല ഒഴിവാക്കാൻ സംസ്ഥാന സർക്കാർ ഇടപെടണമെന്നാവശ്യപ്പെട്ട് റോഷി അഗസ്റ്റ്യൻ എം.എൽ.എയുടെ നേതൃത്വത്തിൽ കേരള കോൺഗ്രസ് എം നേതാക്കൾ മുഖ്യമന്തിക്ക് നിവേദനം നൽകി. കേരള കോൺഗ്രസ് എം സംസ്ഥാന സ്റ്റിയറിങ് കമ്മിറ്റി അംഗം ജോസ് പാലത്തിനാൽ, ഉടുമ്പൻചോല നിയോജകമണ്ഡലം പ്രസിഡൻറ് ജിൻസൺ വർക്കി എന്നിവരടങ്ങുന്ന സംഘമാണ് നിവേദനം നൽകിയത്. മലയോര മേഖലയിൽ ഏറെ ആഘാതം സൃഷ്ടിക്കുന്ന പരീക്ഷണശാലയുടെ നിർമാണത്തിന് കേന്ദ്ര-വനം പരിസ്ഥിതി മന്ത്രാലയം അനുമതി നൽകിയത് പ്രതിഷേധാർഹമാണെന്നും ഇതിനെതിരെ സർക്കാർ നിലപാട് സ്വീകരിക്കണമെന്നും നിവേദനത്തിൽ ആവശ്യപ്പെട്ടു.