ബിൽ കുടിശ്ശികയായപ്പോൾ വൈദ്യുതി ബന്ധം വിച്ഛേദിച്ചു; ഓഫിസിലെത്തി എൻജിനീയറെ കൈയേറ്റം െചയ്ത യുവാവ് അറസ്​റ്റിൽ

കുമരകം: കുടിശ്ശികയെ തുടർന്ന് വൈദ്യുതിബന്ധം വിച്ഛേദിച്ചതിന് അസി. എൻജിനീയറെ കൈയേറ്റം ചെയ്ത് ഓഫിസ് ഉപകരണങ്ങൾ നശിപ്പിച്ചതിന് യുവാവിനെ പൊലീസ് അറസ്റ്റ് ചെയ്തു. കുമരകം കൊഞ്ചുമട നാനൂറിൽചിറ അനീഷിനെയാണ് (37) അറസ്റ്റ് ചെയ്തത്. ബുധനാഴ്ച വൈകീട്ട് 6.15നാണ് സംഭവം. അസി. എൻജിനീയർ ആർ. സുരേഷ്കുമാറിനെയാണ് കൈയേറ്റം ചെയ്തത്. വൈദ്യുതി ബിൽ തുകയായ 2,098 രൂപ കുടിശ്ശികയായതിനെ തുടർന്ന് വൈദ്യുതിബന്ധം വിച്ഛേദിച്ചതിൽ പ്രകോപിതനായെത്തിയ യുവാവിനെ ജീവനക്കാർ ഓഫിസിൽ പൂട്ടിയിട്ട് പൊലീസിൽ അറിയിക്കുകയായിരുന്നു. കുമരകം എസ്.ഐ ജി. രജൻകുമാറി​െൻറ നേതൃത്വത്തിൽ പൊലീസെത്തി ഇയാളെ കസ്റ്റഡിയിലെടുത്തു. സംഭവമറിഞ്ഞ് വൈദ്യുതി വകുപ്പ് കോട്ടയം അസി. എക്സി. എൻജിനീയർ വിജി പ്രഭാകരൻ, എക്സിക്യൂട്ടിവ് എൻജിനീയർ എബി കുര്യാക്കോസ് തുടങ്ങിയവർ കുമരകം കെ.എസ്.ഇ.ബി ഓഫിസ് സന്ദർശിച്ചു.