ദുരഭിമാനക്കൊലകൾ കേരളത്തിൽ ആവർത്തിക്കരുത്​ -പി.കെ. ശ്രീമതി എം.പി

കോട്ടയം: ദുരഭിമാനക്കൊലകൾ കേരളത്തിൽ ഇനി ആവർത്തിക്കരുതെന്ന് പി.കെ. ശ്രീമതി എം.പി. കോട്ടയത്ത് നട്ടാശ്ശേരിയിൽ പ്രണയവിവാഹത്തി​െൻറ പേരിൽ കൊല്ലപ്പെട്ട കെവിൻ പി. ജോസഫി​െൻറ കുടുംബാംഗങ്ങളെ സന്ദർശിച്ചശേഷം പ്രതികരിക്കുകയായിരുന്നു അവർ. ഹരിയാന, യുപി തുടങ്ങിയ സംസ്ഥാനങ്ങളിൽ മാത്രം കേട്ടുകേൾവിയുള്ള ഇത്തരം കൊലപാതകങ്ങൾക്ക് സാക്ഷരകേരളവും സാക്ഷ്യം വഹിച്ചുവെന്നത് നാടിനാകെ അപമാനകരമാണ്. സമൂഹത്തി​െൻറ ഇടപെടലും പിന്തുണയും ഈ കുടുംബത്തിന് ആവശ്യമാണ്. സംസ്ഥാനമൊന്നാകെ ഇവരുടെ കുടുംബത്തോടൊപ്പമാണ്. സാമ്പത്തികമായി പിന്നാക്കം നിൽക്കുന്ന കെവി​െൻറ കുടുംബത്തിന് സ്വന്തമായി ഭൂമിയും വീടും ഇല്ലെന്ന വസ്തുത ഗൗരവത്തോടെ കാണുന്നു. ഈ വിഷയം സർക്കാറി​െൻറ ശ്രദ്ധയിൽപെടുത്തുമെന്നും അവർ പറഞ്ഞു. നഗരസഭ കൗൺസിലർമാരായ പി.എൻ. സരസമ്മ, റെജിമോൻ, ശിശുക്ഷേമ സമിതി സെക്രട്ടറി കൃഷ്ണകുമാരി രാജശേഖരൻ, വനിത സംഘടന നേതാക്കളായ കെ.വി. ബിന്ദു, തങ്കമ്മ ജോർജ്, കെ.എൻ. വേണുഗോപാൽ, പ്രസാദ് എന്നിവരും ഒപ്പമുണ്ടായിരുന്നു.