മഴക്കെടുതി: ദുരിതാശ്വാസ ക്യാമ്പിൽ മൂന്ന്​ ഇ-ടോയ്​​ലറ്റ്​ സ്ഥാപിച്ച്​ അയ്​മനം പഞ്ചായത്ത്​

കോട്ടയം: ദുരിതാശ്വാസ ക്യാമ്പിൽ മൂന്ന് ഇ-ടോയ്ലറ്റ് സ്ഥാപിച്ച് അയ്മനം പഞ്ചായത്ത്. വെള്ളത്താൽ ചുറ്റപ്പെട്ട വരമ്പനകം എസ്.എൻ.ഡി.പി ഹാളിലെ ദുരിതാശ്വാസ ക്യാമ്പിലാണ് മൂന്ന് താൽക്കാലിക ഇ-ടോയ്ലറ്റ് നിർമിച്ചത്. 150പേർ താമസിക്കുന്ന ക്യാമ്പിൽ പ്രാഥമികാവശ്യങ്ങൾ നിറവേറ്റാൻ സൗകര്യമില്ലാത്തതിനാൽ അന്തേവാസികൾ വലഞ്ഞിരുന്നു. ഇൗസാഹചര്യത്തിലാണ് മണൽചാക്ക് നിരത്തി ഫൈബർ നിർമിത ഇ-ടോയ്ലറ്റ് സ്ഥാപിച്ചത്. വെള്ളത്തിൽ മുങ്ങിയ പ്രദേശത്ത് വള്ളത്തിലാണ് സാധനസാമഗ്രികൾ എത്തിച്ചത്. 48,000 രൂപയോളം ചെലവായി. വെള്ളത്താൽ മുങ്ങിയ സമീപത്തെ പ്രദേശങ്ങളിലുള്ളവർക്കും പ്രയോജനം ലഭിക്കുമെന്ന് പഞ്ചായത്ത് പ്രസിഡൻറ് എ.കെ. ആലിച്ചൻ പറഞ്ഞു.