മൂന്നാറിലേക്ക് വന്ന തമിഴ്നാട് ബസ് റോഡിൽനിന്ന്​ തെന്നിനീങ്ങി

രാജകുമാരി: തേനിയിൽനിന്ന് മൂന്നാറിലേക്ക് വരുകയായിരുന്ന തമിഴ്നാട് സർക്കാർ ബസ് രാജകുമാരി എൻ.എസ്.എസ് കോളജിനു സമീപം റോഡിൽനിന്ന് തെന്നിനീങ്ങി. ഒഴിവായത് വൻ അപകടം. വ്യാഴാഴ്ച വൈകീട്ട് മൂന്നോടെയാണ് മുപ്പതിലധികം യാത്രക്കാരുമായി എത്തിയ ബസ് നിയന്ത്രണം വിട്ട് ചെറിയ മരത്തിൽ തട്ടിനിന്നത്. ഡ്രൈവറുടെ അവസരോചിത ഇടപെടൽകൊണ്ടാണ് അപകടം ഒഴിവായത്. ബസ് അൽപം കൂടി നീങ്ങിയിരുന്നെങ്കിൽ കൊക്കയിലേക്ക് പതിക്കുമായിരുന്നു. മറ്റൊരു വാഹനത്തിന് സൈഡ് കൊടുക്കുമ്പോഴാണ് അപകടം. യാത്രക്കാരെ ഇറക്കിയ ശേഷം മണ്ണുമാന്തി യന്ത്രത്തി​െൻറ സഹായത്തോടെ വാഹനം റോഡിലേക്ക് തിരികെ കയറ്റി.