ഇടമലക്കുടിയില്‍ കനത്ത കാറ്റും മഴയും, 15 വീടുകള്‍ നശിച്ചു

മൂന്നാര്‍: രണ്ടു ദിവസങ്ങളായി ഇടമലക്കുടിയില്‍ കനത്ത കാറ്റിലും മഴയിലും നാശനഷ്ടങ്ങള്‍. മണിക്കൂറുകളോളം നിര്‍ത്താതെ പെയ്ത മഴയില്‍ നിരവധി വീടുകളും കൃഷികളും നശിച്ചു. പതിനഞ്ചോളം വീടുകള്‍ ഭാഗികമായി തകര്‍ന്നു. ഇരിപ്പുവല്ലിക്കുടി, രണ്ടാം വാര്‍ഡിലെ കീഴ്വളയംപാറ, നാലാം വാര്‍ഡിലെ കീഴ്പത്തംകുടി എന്നിവിടങ്ങളിലായിരുന്നു നാശനഷ്ടങ്ങള്‍ ഏറെയും. ഈ വാര്‍ഡുകളിലുള്ള ഒരു വാലാപ്പുരയും നശിച്ചു. വാലാപ്പുരയിലുള്ളവരെയും മറ്റുള്ളവരെയും സുരക്ഷിതകേന്ദ്രങ്ങളിലേക്ക് മാറ്റി. കുരുമുളക്, കപ്പ, കമുക് തുടങ്ങിയ വിളകളാണ് നശിച്ചത്. കനത്ത കാറ്റില്‍ മൊബൈല്‍ ടവറും ഭാഗികമായി തകര്‍ന്നു. ഇതോടെ പരസ്പരം ബന്ധപ്പെടാനും സാധിക്കാതെ നിലയിലാണ്. പഞ്ചായത്ത് പ്രസിഡൻറി​െൻറ നേതൃത്വത്തില്‍ ദുരന്തനിവാരണ പ്രവര്‍ത്തനം നടക്കുന്നുണ്ട്. കൃഷി ഓഫിസർ, പഞ്ചായത്ത് ഓഫിസര്‍ തുടങ്ങിയ ഉദ്യോഗസ്ഥര്‍ ഇടമലക്കുടിയിലെത്തി രക്ഷാപ്രവര്‍ത്തനങ്ങള്‍ക്ക് നേതൃത്വം നല്‍കി.