അയൽവാസിയെ കുത്തിക്കൊലപ്പെടുത്തിയ കേസിൽ ജീവപര്യന്തം തടവ്​

കോട്ടയം: അയൽവാസിയെ കുത്തിക്കൊലപ്പെടുത്തിയ കേസിൽ ജീവപര്യന്തം തടവും പിഴയും. ഞീഴൂർ കാഞ്ഞിരംപാറയിൽ ജോർജിനെ(ജോയി- -52) കൊലപ്പെടുത്തിയ കേസിൽ അയൽവാസി ആശാരിക്കാലായിൽ തോമസിനെയാണ് (തോമാച്ചൻ -60) ജീവപര്യന്തം തടവിനും 60,000 രൂപ പിഴ അടക്കാനും ശിക്ഷിച്ചത്. കൊലപാതകത്തിനു ജീവപര്യന്തവും വീട്ടിൽ അതിക്രമിച്ചു കയറിയതിന് അഞ്ചു വർഷവുമാണ് തടവ്. രണ്ടുശിക്ഷയും ഒരുമിച്ച് അനുഭവിച്ചാൽ മതിയെന്ന് ശിക്ഷവിധിച്ച കോട്ടയം അഡീഷനൽ ജില്ല കോടതി ഒന്ന് ഉത്തരവിട്ടു. 2011 ഫെബ്രുവരി 23നായിരുന്നു സംഭവം. ജോയിയും തോമസും തമ്മിൽ വഴിത്തർക്കം നിലനിന്നിരുന്നു. ഇതി​െൻറ വൈരാഗ്യത്തിൽ വീടി​െൻറ വരാന്തയിലിരുന്ന ജോയിയെ പിടിച്ചിറക്കി കുത്തിക്കൊന്നുവെന്നാണ് കേസ്. കടുത്തുരുത്തി പൊലീസാണു കേസ് അന്വേഷിച്ചത്.