പത്തനംതിട്ടയെ മഞ്ഞയണിയിച്ച്​ ചതയദിനാഘോഷം

പത്തനംതിട്ട: മഞ്ഞ വസ്ത്രമണിഞ്ഞും മഞ്ഞക്കുടചൂടിയും നൂറുകണക്കിന് വനിതകളടക്കം അണിനിരന്ന ഘോഷയാത്രയോടെ ശ്രീനാരായണീയർ ചതയദിനം ആഘോഷിച്ചു. ശ്രീനാരായണഗുരു ജയന്തിയോടനുബന്ധിച്ച് സംഘടിപ്പിച്ച ഘോഷയാത്ര മണിക്കൂറുകളോളം നഗരത്തെ മഞ്ഞനിറത്തിൽ ലയിപ്പിച്ചു. പ്രൈവറ്റ് ബസ് സ്റ്റാൻഡ് പരിസരത്തുനിന്നാരംഭിച്ച ഘോഷയാത്ര നഗരം ചുറ്റി അവിടെ തന്നെ സമാപിച്ചു. ബാൻഡ് മേളങ്ങളും തെയ്യവും കാവടിയും തുടങ്ങി നാടൻ കലാരൂപങ്ങളും ദേശീയോദ്ഗ്രഥന സന്ദേശം നൽകുന്ന നിശ്ചലദൃശ്യങ്ങളും േഘാഷയാത്രക്ക് മിഴുവേകി. മേളങ്ങൾക്കൊപ്പം ചുവടുവെച്ച് ചില വിദേശികളും ഘോഷയാത്രയിൽ ചേർന്നു. കാഴ്ചക്കാരായി നിന്ന വിദേശ വിനോദസഞ്ചാരികളാണ് ചെണ്ടമേളത്തി​െൻറ ആവേശത്തിൽ ഘോഷയാത്രയുടെ ഭാഗമായാത്. എസ്.എൻ.ഡി.പി ശാഖകളുടെ ബാനറുകൾക്ക് കീഴിലാണ് സമുദായ അംഗങ്ങൾ അണിനിരന്നത്.