ഭിന്നശേഷിക്കാരായ കുട്ടികളുടെ വിവരങ്ങൾ സൂക്ഷിക്കണമെന്ന്​ ബാലാവകാശ കമീഷൻ

തൊടുപുഴ: ഭിന്നശേഷിക്കാരായ കുട്ടികളുടെ വിവരങ്ങൾ തദ്ദേശ സ്ഥാപനങ്ങൾ കൃത്യമായി സൂക്ഷിക്കണമെന്നും ആനുകൂല്യം ലഭിച്ചെന്ന് പദ്ധതി നിർവഹണ ഉദ്യോഗസ്ഥർ ഉറപ്പുവരുത്തണമെന്നും ബാലാവകാശ കമീഷ​െൻറ ഉത്തരവ്. മാനസിക വെല്ലുവിളികൾ നേരിടുന്നവർക്കുള്ള തൊടുപുഴ നഗരസഭയുടെ 2016-17 വർഷത്തെ സ്കോളർഷിപ് പദ്ധതിയിൽ 90 ശതമാനം ഓട്ടിസം ബാധിച്ച മകനെ ഉൾപ്പെടുത്തിയില്ലെന്ന് ചൂണ്ടിക്കാട്ടി തൊടുപുഴ നെടുങ്കല്ലേൽ ജോസ് അഗസ്റ്റിൻ നൽകിയ പരാതിയിലാണ് കമീഷൻ അംഗം സിസ്റ്റർ ബിജി ജോസി​െൻറ ഉത്തരവ്. തൊടുപുഴ നഗരസഭയുടെ ഗുണഭോക്തൃ ലിസ്റ്റിൽ മകൻ ജോഷ്വാ ജോസി​െൻറ പേരില്ലെന്ന കാരണത്താൽ സ്കോളർഷിപ് നിഷേധിച്ചെന്നായിരുന്നു ജോസ് അഗസ്റ്റി​െൻറ പരാതി. കൃത്യസമയത്ത് അപേക്ഷ നൽകാത്തതിനാൽ ഗുണഭോക്തൃ ലിസ്റ്റിൽ പേര് ചേർത്തിട്ടില്ലെന്നും ഈ സാഹചര്യത്തിൽ 2016-17 വർഷത്തെ സ്കോളർഷിപ് പദ്ധതിയിൽ ഉൾപ്പെടുത്താൻ കഴിയില്ലെന്നുമായിരുന്നു നഗരസഭ സെക്രട്ടറിയുടെ മറുപടി. എന്നാൽ, മകന് ഇതേ പദ്ധതിയിൽ മുമ്പ് സ്കോളർഷിപ് ലഭിച്ചിട്ടുണ്ടെന്നും മുനിസിപ്പൽ രേഖകളിൽ മക​െൻറ പേരുണ്ടെന്ന് വ്യക്തമാണെന്നും ജോസ് അഗസ്റ്റിൻ വാദിച്ചു. ഈ സാഹചര്യത്തിൽ മാനസിക വെല്ലുവിളികൾ നേരിടുന്ന കുട്ടികൾക്കുള്ള ആനുകൂല്യങ്ങൾക്കായി എല്ലാ വർഷവും അപേക്ഷിക്കണമെന്ന അവസ്ഥ ഒഴിവാക്കി നിശ്ചിത വർഷങ്ങളിലേക്ക് ഒറ്റ അപേക്ഷയിൽ സ്കോളർഷിപ് നൽകുന്നതിനുള്ള ക്രമീകരണം ബന്ധപ്പെട്ടവർ ചെയ്യണമെന്നും നിർദേശിച്ചു. ഗുണഭോക്തൃ ലിസ്റ്റി​െൻറ അന്തിമ പട്ടിക അംഗീകരിച്ച് പ്രസിദ്ധീകരിക്കുന്നതിനു മുമ്പ് അതത് വാർഡ് അംഗങ്ങൾ എല്ലാ ഗുണഭോക്താക്കളും ഉണ്ടോയെന്ന് നിരീക്ഷിക്കണമെന്നും കമീഷൻ ഉത്തരവിട്ടു.