ജില്ലയിൽ കൂടുതൽ ചെയിൻ സർവിസുകളുമായി കെ.എസ്.ആർ.ടി.സി

കോട്ടയം: കെ.എസ്.ആർ.ടി.സി കോട്ടയം ഡിപ്പോയിൽനിന്ന് പുതിയതായി ചെയിൻ സർവിസുകൾ ആരംഭിക്കുന്നു. കോട്ടയം-ചേർത്തല, കോട്ടയം-മണർകാട്-പാലാ-ഈരാറ്റുപേട്ട, കോട്ടയം-ചങ്ങനാശ്ശേരി-ഏറ്റുമാനൂർ, കോട്ടയം-റാന്നി എന്നിവയാണ് പുതിയ ചെയിൻ സർവിസുകൾ. ഇതിൽ കോട്ടയം-റാന്നി സർവിസുകൾ കഴിഞ്ഞ ആഴ്ച തുടക്കമായി. ബാക്കിയുള്ളവ കെ.എസ്.ആർ.ടി.സി എം.ഡിയുടെ അനുമതി ലഭിക്കുന്നതോടെ സർവിസ് തുടങ്ങുമെന്ന് ഡിപ്പോ അധികൃതർ പറഞ്ഞു. നിലവിൽ കോട്ടയം-കുമളി, കോട്ടയം-എറണാകുളം ചെയിൻ സർവിസുകളാണ് ഡിപ്പോയിൽനിന്നുള്ളത്. കോട്ടയം-റാന്നികൂടി വന്നതോടെ മൂന്ന് ചെയിൻ സർവിസായി. 10 ബസാണ് ഇതിനായി ഉപയോഗിക്കുന്നത്. കോട്ടയം-ചേർത്തല ചെയിനിൽ ഇരു ഡിപ്പോയിൽനിന്ന് അഞ്ച് ബസ് വീതമാണ് സർവിസ് നടത്താൻ ഉദ്ദേശിക്കുന്നത്. 15 മിനിറ്റ് ഇടവേളകളിൽ ബസുകൾ ഒാടും. പുലർച്ച 5.30 മുതൽ രാത്രി 9.30വരെയാണ് സർവിസ്. കോട്ടയം-ഈരാറ്റുപേട്ട ചെയിനിൽ കോട്ടയത്തുനിന്ന് അഞ്ചും പാലാ, ഈരാറ്റുപേട്ട ഡിപ്പോകളിൽനിന്ന് 20 മിനിറ്റ് ഇടവേളയിൽ നാലുവീതവും സർവിസ് നടത്തും. കോട്ടയം-ചങ്ങനാശ്ശേരി-ഏറ്റുമാനൂർ ചെയിൻ സർവിസ് ഓപറേറ്റ് ചെയ്യുന്നത് കോട്ടയം, ചങ്ങനാശ്ശേരി ഡിപ്പോകളിൽനിന്നാണ്. ബസുകൾ ഡിപ്പോയിൽ എത്തുന്ന മുറക്ക് സർവിസുകൾ ആരംഭിക്കും. സ്വകാര്യബസുകളുടെ കുത്തകയായി മാറിയ റൂട്ടുകളിൽ കെ.എസ്.ആർ.ടി.സി ഇടം പിടിക്കുന്നേതാടെ ദിവസവരുമാനത്തിൽ വർധന ഉണ്ടാകുമെന്നാണ് പ്രതീക്ഷിക്കുന്നത്.