ഭവനസന്ദർശത്തിനിടെ എ.എസ്.ഐക്ക്​ നായുടെ കടിയേറ്റു

തൊടുപുഴ: ജനമൈത്രി പൊലീസി​െൻറ വിവരശേഖരണത്തി​െൻറ ഭാഗമായ ഭവനസന്ദർശനത്തിനിടെ എ.എസ്.ഐക്ക് നായുടെ ആക്രമത്തിൽ പരിക്കേറ്റു. കാളിയാർ സ്റ്റേഷനിലെ എ.എസ്.ഐയായ സണ്ണിക്കാണ് നായുടെ കടിയേറ്റ് കാലിന് പരിക്കുപറ്റിയത്. ഇതേതുടർന്ന് തൊടുപുഴ താലൂക്ക് ആശുപത്രിയിൽ ചികിത്സതേടി. ചൊവ്വാഴ്ച രാവിലെ 11.30ന് പടി-കോടിക്കുളം പാറപ്പുഴക്ക് സമീപത്തെ വീട്ടിലെത്തിയപ്പോഴാണ് സംഭവം. വീടിനുമുന്നിൽ കിടക്കുകയായിരുന്ന രണ്ട് നായ്ക്കൾ പൊലീസ് ഉദ്യോഗസ്ഥനുനേരെ പാഞ്ഞടുക്കുകയായിരുന്നു. ഒരു നായെ പ്രതിരോധിക്കുന്നതിനിടെ കൂടെയുണ്ടായിരുന്നവ കാലിൽ കടിച്ചു. ജനമൈത്രി പൊലീസി​െൻറ സർവേയുടെ ഭാഗമായി വിവര ശേഖരണത്തിനായി വാർഡുകൾ കേന്ദ്രീകരിച്ച് പൊലീസ് ഉദ്യോഗസ്ഥർ കയറിയിറങ്ങുകയാണ്. 30നുമുമ്പ് സർവേ റിപ്പോർട്ട് നൽകണമെന്നാണ് നിർദേശം.