ഏറ്റുമാനൂരില്‍ ആര്‍.എസ്.എസ് –ഡി.വൈ.എഫ്.ഐ സംഘര്‍ഷം; രണ്ടുപേര്‍ക്ക് പരിക്ക്

ഏറ്റുമാനൂര്‍: ഏറ്റുമാനൂരില്‍ ആര്‍.എസ്.എസ്-ഡി.വൈ.എഫ്.ഐ സംഘര്‍ഷത്തില്‍ രണ്ടുപേര്‍ക്ക് പരിക്കേറ്റു. സംഭവത്തില്‍ രണ്ടുപേരെ പൊലീസ് കസ്റ്റഡിയിലെടുത്തു. കഴിഞ്ഞദിവസം ഏറ്റുമാനൂര്‍ മഹാദേവ ക്ഷേത്രത്തിന് സമീപമുണ്ടായ സംഭവത്തിന്‍െറ തുടര്‍ച്ചയാണ് സംഘര്‍ഷമെന്ന് പൊലീസ് പറഞ്ഞു. ഡി.വൈ.എഫ്.ഐ പ്രവര്‍ത്തകനെ മര്‍ദിച്ചെന്ന പരാതിയില്‍ ആര്‍.എസ്.എസ് ഭാരവാഹിയെയും മറ്റൊരാളെയും പൊലീസ് സ്റ്റേഷനിലേക്ക് വിളിപ്പിച്ചിരുന്നു. ഇതറിഞ്ഞ് ആര്‍.എസ്.എസ്-ബി ജെ.പി പ്രവര്‍ത്തകര്‍ ചൊവ്വാഴ്ച രാത്രി പൊലീസ് സ്റ്റേഷനിലത്തെിയിരുന്നു. ഇവിടെനിന്ന് മടങ്ങുന്നതിനിടെ പേരൂര്‍ പായിക്കാട് സ്വദേശി മനീഷ്, അബി എന്നിവരെ ഡി.വൈ.എഫ്.ഐ പ്രവര്‍ത്തകര്‍ മര്‍ദിക്കുകയായിരുന്നത്രെ. ഇവരെ കോട്ടയം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. സംഭവത്തെതുടര്‍ന്ന് ഇരുകൂട്ടരും പൊലീസ് സ്റ്റേഷന് മുന്നില്‍ തടിച്ചുകൂടി. രണ്ടു ഡി.വൈ.എഫ്.ഐ പ്രവര്‍ത്തകരാണ് കസ്റ്റഡിയിലുള്ളത്.