ഭവന നിര്‍മാണത്തിനും കര്‍ഷക ക്ഷേമത്തിനും മുന്‍ഗണന

കാഞ്ഞിരപ്പള്ളി: ഭവന നിര്‍മാണത്തിനും കര്‍ഷക ക്ഷേമത്തിനും മുന്‍ഗണന നല്‍കുന്ന കാഞ്ഞിരപ്പള്ളി ബ്ളോക് പഞ്ചായത്ത് ബജറ്റ് വൈസ് പ്രസിഡന്‍റ് ജോളി മടുക്കക്കുഴി അവതരിപ്പിച്ചു. 33,33,00,000 രൂപ വരവും 33,32,00,000 രൂപ ചെലവും 1,00,000 രൂപ നീക്കിയിരിപ്പും പ്രതീക്ഷിക്കുന്ന ബജറ്റില്‍ ബ്ളോക് പഞ്ചായത്തിന്‍െറ പരിധിയില്‍ വരുന്ന ഏഴ് പഞ്ചായത്തിലായി 500ല്‍പരം വീടുകള്‍ നിര്‍മിക്കുന്നതിനും കാര്‍ഷിക വിപണന കേന്ദ്രങ്ങള്‍ക്ക് അടിസ്ഥാന സൗകര്യത്തിന് വേണ്ടുന്ന തുകയും അടുക്കള പച്ചക്കറി കൃഷിക്ക് ആവശ്യമായ തുകയും വകയിരുത്തിയിട്ടുണ്ട്. വഴിയോര വിശ്രമ കേന്ദ്രങ്ങള്‍, കാന്‍സര്‍ നിര്‍ണയ ക്യാമ്പുകള്‍, തൊഴിലുറപ്പ് പദ്ധതിയില്‍പെടുത്തിയുള്ള വികസനപ്രവര്‍ത്തനങ്ങള്‍, ഗ്രാമീണ റോഡുകള്‍ സഞ്ചാരയോഗ്യമാക്കല്‍ എന്നിവക്കും മുന്‍ഗണന നല്‍കിയിട്ടുണ്ട്. വൃദ്ധര്‍, വികലാംഗര്‍, ശിശുക്കള്‍, സ്ത്രീകള്‍ തുടങ്ങിയവര്‍ക്ക് ആവശ്യമായ ക്ഷേമ പദ്ധതികള്‍, പട്ടികജാതി, വര്‍ഗ കോളനികള്‍ നവീകരിക്കല്‍, കുടിവെള്ള ക്ഷാമ പരിഹാരത്തിന് ജലസേചന പദ്ധതികള്‍ എന്നിവയടക്കമുള്ള വിവിധ ക്ഷേമപ്രവര്‍ത്തനങ്ങള്‍ ബജറ്റിലുണ്ട്. ബ്ളോക് പഞ്ചായത്ത് പ്രസിഡന്‍റ് അന്നമ്മ ജോസഫ് അധ്യക്ഷത വഹിച്ചു. ബ്ളോക് പഞ്ചായത്ത് അംഗങ്ങളായ ജയിംസ് പി. സൈമണ്‍, ശുഭേഷ് സുധാകര്‍, റോസമ്മ ആഗസ്തി, മറിയമ്മ ടീച്ചര്‍, അഡ്വ. പി.ഐ. ഷെമീര്‍, വി.ടി. അയ്യൂബ്ഖാന്‍, പ്രകാശ് പള്ളിക്കൂടം, ലീലാമ്മ കുഞ്ഞുമോന്‍, ആശ ജോയി, സോഫി ജോസഫ്, അജിത രതീഷ്, പി.ജി. വസന്തകുമാരി, ബി.ഡി.ഒ കെ.എസ്. ബാബു എന്നിവര്‍ സംസാരിച്ചു.