മുഖപടമണിഞ്ഞ എഴുത്തുകാര്‍; മുസ്ലിം ഗേള്‍സിലെ വായനദിനം ശ്രദ്ധേയമായി

ഈരാറ്റുപേട്ട: വിദ്യാര്‍ഥികള്‍ എഴുത്തുകാരുടെ മുഖപടമണിഞ്ഞ് അവരുടെ കൃതികളുമായി വിദ്യാര്‍ഥികളെ വായനയിലേക്ക് ക്ഷണിക്കുന്ന പരിപാടി ശ്രദ്ധേയമായി. ഈരാറ്റുപേട്ട മുസ്ലിം ഗേള്‍സ് ഹയര്‍ സെക്കന്‍ഡറി സ്കൂളിലെ സന്നദ്ധ സംഘടനയായ സാഫ് ആഭിമുഖ്യത്തില്‍ നടത്തിയ വായനദിനമാണ് എഴുത്തുകാരുടെ മുഖപടം അണിഞ്ഞ് വിദ്യാര്‍ഥികള്‍ വ്യത്യസ്തമാക്കിയത്. വിവിധ എഴുത്തുകാരുടെ കൃതികള്‍ വേദിയില്‍ പരിചയപ്പെടുത്തുന്ന വിധം പുസ്തക പരിചയവും വായനദിന പ്രശ്നോത്തരിയും സംഘടിപ്പിച്ചു. വിദ്യാര്‍ഥികള്‍ വായിച്ചിരിക്കേണ്ട 20 പുസ്തകങ്ങള്‍ അധ്യാപകര്‍ തിരഞ്ഞെടുത്ത് സാഫ് അംഗങ്ങള്‍ക്ക് വായനക്കായി നല്‍കി. വായനക്കു ശേഷം വായനക്കുറിപ്പുകള്‍ തയാറാക്കി അടുത്ത 20 പേര്‍ക്ക് പുസ്തകം കൈമാറുന്നതാണ് പദ്ധതി. ഹെഡ്മിസ്ട്രസ് ആര്‍. ഗീത, പി.എന്‍. പണിക്കര്‍ അനുസ്മരണം നടത്തി. എം.എഫ്. അബ്ദുല്‍ ഖാദര്‍, സാഫ് കണ്‍വീനര്‍ മുഹമ്മദ് ലൈസല്‍, കെ.ജി. രാജി, അന്‍സാര്‍ അലി, പി.ജി. ജയന്‍ തുടങ്ങിയവര്‍ സംസാരിച്ചു.