സി.പി.എം നേതൃത്വത്തില്‍ കോട്ടയത്ത് യോഗാപ്രദര്‍ശനം

കോട്ടയം: അന്താരാഷ്ട്ര യോഗാ ദിനമായ ചൊവ്വാഴ്ച സി.പി.എമ്മിന്‍െറ സഹകരണത്തോടെ ഇന്ത്യന്‍ മാര്‍ഷല്‍ അക്കാദമി ആന്‍ഡ് യോഗാ സ്റ്റഡി സെന്‍ററിന്‍െറ നേതൃത്വത്തില്‍ യോഗാ പ്രദര്‍ശനം സംഘടിപ്പിക്കും തിരുനക്കര മൈതാനിയില്‍ വൈകീട്ട് നാലിന് നടക്കുന്ന കൂട്ടയോഗ പ്രദര്‍ശനത്തില്‍ പുരുഷന്മാരും വനിതകളുമടക്കം നാനൂറുപേര്‍ പങ്കെടുക്കും. ശാരീരിക-മാനസിക ആരോഗ്യം മെച്ചപ്പെടുത്തുന്നതിന് ലക്ഷ്യമിട്ട് ശാസ്ത്രീയമായ സിലബസില്‍ ജില്ലയില്‍ പരിശീലനം നേടിയവരുടെ യോഗാഭ്യാസ പ്രദര്‍ശനമാണ് ഇവിടെ നടക്കുന്നത്. ദ്രോണാചാര്യ തോമസ് മാഷ് മുഖ്യാതിഥിയായിരിക്കും. യോഗാ പ്രദര്‍ശനത്തില്‍ എത്തുന്നവര്‍ യൂനിഫോമായ വെള്ള ട്രാക്ക് സ്യൂട്ടിലായിരിക്കും അണിനിരക്കുക. യോഗാ പ്രദര്‍ശനത്തിന്‍െറ മുന്നോടിയായി പരിശീലകര്‍ എല്ലാംതന്നെ പരിശീലനം പൂര്‍ത്തിയാക്കി. യോഗാ പ്രദര്‍ശനത്തിനുശേഷം തിരുനക്കര മൈതാനത്തു പൊതുസമ്മേളനവും നടക്കും.