കൊതുക് പെരുകിയിട്ടും കുലുക്കമില്ലാതെ അധികൃതര്‍

കുറവിലങ്ങാട്: നാട്ടില്‍ വ്യാപകമായി കൊതുക് പെരുകിയിട്ടും അധികൃതര്‍ക്ക് കുലുക്കമില്ല. മഴ ആരംഭിച്ചതോടെ കൊതുകിന്‍െറ ശല്യം ഇരട്ടിയിലേറെയായി. വെള്ളം കെട്ടിക്കിടക്കുന്നതാണ് കൊതുക് പെരുകാന്‍ കാരണം. കാലവര്‍ഷം ശക്തമാകുന്നതിന് മുമ്പ് അധികൃതര്‍ ഉണര്‍ന്നുപ്രവര്‍ത്തിച്ചില്ളെങ്കില്‍ പകര്‍ച്ചവ്യാധികള്‍ ഉള്‍പ്പെടെ നാട്ടില്‍ വര്‍ധിക്കും. ടാപ്പിങ് നിലച്ചതോടെ റബര്‍ തോട്ടത്തിലേക്ക് പലരും പോകുന്നില്ല. തോട്ടങ്ങളില്‍ ഉപയോഗശൂന്യമായി കിടക്കുന്ന ചിരട്ടകള്‍, മറ്റു പാത്രങ്ങള്‍ എന്നിവ കൊതുക് പെരുകാനും പലയിടത്തും ഡെങ്കിപ്പനി ഉള്‍പ്പെടെയുള്ള രോഗങ്ങള്‍ പടരാനും കാരണമായി. ഇതിനു പുറമെ നഗരപ്രദേശങ്ങളില്‍ വന്‍തോതില്‍ മാലിന്യം കുന്നുകൂടി ചീയുന്നതും ഓടകളിലെ മാലിന്യവും കൊതുകുകളുടെ വളര്‍ച്ചക്ക് അനുകൂല ഘടകമായി. കൊക്കോ, കവുങ്ങ്, പൈനാപ്പ്ള്‍, തെങ്ങ് എന്നിവയുടെ കൃഷിയിടങ്ങളിലും ഡെങ്കിപ്പനിക്ക് കാരണമാകാവുന്ന ഈഡിസ് കൊതുകുകള്‍ വളരാന്‍ സാധ്യതയുണ്ടെന്ന് ആരോഗ്യവകുപ്പ് ഉദ്യോഗസ്ഥന്‍ പറഞ്ഞു. കൊക്കോക്ക് വില കുറവായതിനാല്‍ പല കര്‍ഷകരും ഇതു പറിച്ചെടുക്കുന്നില്ല. പൈനാപ്പ്ള്‍ കൃഷി വ്യാപകമായതും കൊതുകിന് അനുകൂലമായി. റബര്‍ ചിരട്ടകള്‍, ഉപയോഗശൂന്യമായ പാത്രങ്ങള്‍, ടെറസ്, ചെടിച്ചട്ടികള്‍, ഫ്രിഡ്ജിലെ ട്രേ എന്നിവയില്‍ വെള്ളം കെട്ടിക്കിടക്കാന്‍ അനുവദിക്കരുതെന്ന് ആരോഗ്യവകുപ്പ് അധികൃതര്‍ അഭിപ്രായപ്പെട്ടു. മഴക്കാലപൂര്‍വ ശുചീകരണം ചടങ്ങ് മാത്രമായാണ് അധികൃതര്‍ നടത്തുന്നത്. കുന്നുകൂടിയ മാലിന്യം നീക്കം ചെയ്യാനോ തോടുകള്‍ ഉള്‍പ്പെടെയുള്ളവ വൃത്തിയാക്കാനോ അധികൃതര്‍ തയാറാകുന്നില്ല. മഴ കനത്തതോടെ മാലിന്യം ചീഞ്ഞളിയുകയാണ്. കൊതുകിനെ തുരത്താന്‍ ഫോഗിങ്ങിന് തയാറാണെന്ന് ആരോഗ്യവകുപ്പ് അധികൃതര്‍ പറയുന്നുണ്ടെങ്കിലും മേഖലയിലെ ഒരു പഞ്ചായത്തിലും ഫോഗിങ് നടത്തിയിട്ടില്ല.