മൈക്ക് നിഷേധിച്ചതില്‍ പ്രതിഷേധിച്ച് വായ മൂടിക്കെട്ടി പ്രകടനം

ഈരാറ്റുപേട്ട: സി.പി.എം ബ്രാഞ്ച് സെക്രട്ടറിയായിരുന്ന കുന്നുംപുറത്ത് നസീറിന്‍െറ കൊലപാതകവുമായി ബന്ധപ്പെട്ട് യു.ഡി.എഫ് ഇന്ന് നടത്താനിരുന്ന വിശദീകരണ യോഗത്തില്‍ പൊലീസ് മൈക്ക് ഉപയോഗിക്കുന്നതിന് അനുമതി നിഷേധിച്ചതില്‍ പ്രതിഷേധിച്ച് യു.ഡി.എഫ് മണ്ഡലം കമ്മിറ്റിയുടെ ആഭിമുഖ്യത്തില്‍ വായ മൂടിക്കെട്ടി പ്രകടനം നടത്തി. ലീഗ് ഹൗസില്‍നിന്ന് ആരംഭിച്ച പ്രകടനം നഗരം ചുറ്റിയശേഷം കുരിക്കള്‍ നഗറില്‍ എത്തി. തുടര്‍ന്ന് ധര്‍ണ നടത്തി. മുസ്ലിം ലീഗ് ജില്ലാ പ്രസിഡന്‍റ് പി.എം. ഷരീഫ് ഉദ്ഘാടനം ചെയ്തു. കേസ് ക്രൈം ബ്രാഞ്ച് അന്വേഷിക്കുന്നതുവരെ ജനകീയ പ്രക്ഷോഭത്തിന് യു.ഡി.എഫ് നേതൃത്വം നല്‍കണമെന്ന് അദ്ദേഹം പറഞ്ഞു. യു.ഡി.എഫ് ചെയര്‍മാന്‍ വി.പി. അബ്ദുല്‍ ലത്തീഫ് അധ്യക്ഷത വഹിച്ചു. തോമസ് കല്ലാടന്‍, അഡ്വ. ജോമോന്‍ ഐക്കര, എം.പി. സലീം, അഡ്വ. വി.എം. മുഹമ്മദ് ഇല്യാസ്, വി.പി. മജീദ്, പി.എച്ച്. നൗഷാദ്, വി.എച്ച്. നാസര്‍, മാഹിന്‍ തലപ്പള്ളില്‍, അഡ്വ. വി.പി. നാസര്‍ എന്നിവര്‍ സംസാരിച്ചു.