ടൗണിലെ കായ്ഫലമുള്ള പേരമരം നശിപ്പിക്കാന്‍ ശ്രമം

പൊന്‍കുന്നം: പൊതുസ്ഥലത്ത് നില്‍ക്കുന്ന കായ്ഫലമുള്ള അഞ്ചുവര്‍ഷത്തിലേറെ പഴക്കമുള്ള പേരമരം സാമൂഹികവിരുദ്ധര്‍ നശിപ്പിക്കാന്‍ ശ്രമിക്കുന്നു. രാജേന്ദ്ര മൈതാനത്ത് നില്‍ക്കുന്ന പേരയാണ് ഭീഷണി നേരിടുന്നത്. അടുത്തിടെ വരെ ടാക്സി സ്റ്റാന്‍ഡിലെ ഡ്രൈവര്‍മാരും കുട്ടികളും പേരക്ക പറിച്ചിരുന്നു. കൊടുംവേനലില്‍ തണലേകിയിരുന്നതും ഈ വൃക്ഷം തന്നെയായിരുന്നു. ലോറി സ്റ്റാന്‍ഡിലെ ഡ്രൈവര്‍മാരും സമീപവാസികളും ചേര്‍ന്ന് വെള്ളവും വളവും നല്‍കി പരിപാലിച്ചുപോന്നിരുന്ന പേരമരമാണ് പെട്ടെന്ന് ഉണങ്ങാന്‍ തുടങ്ങിയത്. ഇപ്പോള്‍ നല്ല മഴ ലഭിക്കുമ്പോവും മരം ഉണങ്ങുന്നത് സാമൂഹികവിരുദ്ധരുടെ ചെയ്തികള്‍ മൂലമാണെന്നാണ് സൂചന. ഇവര്‍ക്കെതിരെ നടപടി സ്വീകരിക്കണമെന്ന ആവശ്യം ശക്തമായി.