വാഹനത്തിന്‍െറ ലിവര്‍ ഉപയോഗിച്ച് തലക്കടിച്ച് കൊല്ലാന്‍ ശ്രമം: മൂന്നുപേര്‍ അറസ്റ്റില്‍

ചങ്ങനാശേരി: വാഹനത്തിന്‍െറ ലിവര്‍ ഉപയോഗിച്ച് ഗൃഹനാഥനെ തലക്കടിച്ചു കൊല്ലാന്‍ ശ്രമിച്ച കേസില്‍ മൂന്നുപേരെ തൃക്കൊടിത്താനം പൊലീസ് അറസ്റ്റ് ചെയ്തു. മാമ്മൂട് മാന്നില വാറ്റുപറമ്പില്‍ മോനപ്പന്‍ (40), ചേന്നമറ്റം കൊച്ചുപറമ്പില്‍ ടോയ് (29), അമ്പാടന്‍കോളനി ചിറയിടം മനോജ് (42) എന്നിവരെയാണ് അറസ്റ്റ് ചെയ്തത്. നടയ്ക്കപ്പാടം പാറങ്ങാട് ജോസ് ജോസഫിനാണ് (54) ആക്രമണത്തില്‍ പരിക്കേറ്റത്. ജോസ് സ്വകാര്യ ആശുപത്രിയില്‍ ചികിത്സയിലാണ്. മോനപ്പന്‍െറ ഉടമസ്ഥതയില്‍ നടയ്ക്കപ്പാടത്തുള്ള വര്‍ക്ക്ഷോപ്പിനു മുന്നില്‍ ശനിയാഴ്ച വൈകീട്ടാണ് സംഭവം. മദ്യലഹരിയിലായിരുന്ന സംഘം ലിവര്‍ ഉപയോഗിച്ച് ആക്രമണം നടത്തുകയായിരുന്നുവെന്നു പൊലീസ് പറഞ്ഞു. ചങ്ങനാശേരി സി.ഐ സക്കറിയ മാത്യു, തൃക്കൊടിത്താനം എസ്.ഐ സുധീഷ്കുമാര്‍, എ.എസ്.ഐ ചന്ദ്രബാബു, സിവില്‍ പൊലീസ് ഓഫിസര്‍ ഷാജി എന്നിവരുടെ നേതൃത്വത്തിലായിരുന്നു അറസ്റ്റ്. കോടതിയില്‍ ഹാജരാക്കി റിമാന്‍ഡ് ചെയ്തു.