നവീകരണം നടക്കുന്ന എം.സി റോഡില്‍ വീണ്ടും അപകടങ്ങള്‍

കോട്ടയം: നവീകരണം നടക്കുന്ന എം.സി റോഡില്‍ വീണ്ടും അപകടങ്ങള്‍. എസ്.എച്ച് മൗണ്ട് കവലക്ക് സമീപം ബുധനാഴ്ച രാത്രിയിലുണ്ടായ രണ്ട് അപകടത്തില്‍ യുവാക്കള്‍ ഉള്‍പ്പെടെ മൂന്നുപേര്‍ക്കു പരിക്കേറ്റു. റോഡില്‍ കൂട്ടിയിട്ട മെറ്റലില്‍ കയറി ബൈക്കുകള്‍ നിയന്ത്രണംവിട്ട് മറിഞ്ഞാണ് അപകടമുണ്ടായത്. വൈകീട്ട് ഏഴോടെ ജോലി കഴിഞ്ഞ് വീട്ടിലേക്ക് മടങ്ങുകയായിരുന്ന നട്ടാശ്ശേരി ഭാഗത്തെ യുവാക്കള്‍ സഞ്ചരിച്ച ബൈക്ക് മറിഞ്ഞതാണ് ആദ്യ അപകടം. റോഡിന് നടുവിലേക്കുവീണ ഇവരുടെ കൈകള്‍ക്കും കാലുകള്‍ക്കും പരിക്കേറ്റു. ഇതോടെ നാട്ടുകാര്‍ റോഡില്‍ ചിതറിക്കിടന്ന മെറ്റല്‍ കൂട്ടിയിടുകയും മുന്നറിയിപ്പ് ബോര്‍ഡ് സ്ഥാപിക്കുകയും ചെയ്തു. മുന്നറിയിപ്പ് ബോര്‍ഡ് നിലംപതിക്കുകയും രാത്രി പത്തോടെ ഇതേസ്ഥലത്ത് രണ്ടാമത്തെ അപകടം ഉണ്ടാവുകയുമായിരുന്നു. ബൈക്ക് യാത്രികനായ മധ്യവയസ്കനാണ് അപകടത്തില്‍പെട്ടത്. ഏറ്റുമാനൂര്‍ ഭാഗത്തേക്ക് പോവുകയായിരുന്ന ഇദ്ദേഹം മെറ്റല്‍ കൂനയില്‍ ഇടിക്കാതിരിക്കാന്‍ വെട്ടിച്ചതിനത്തെുടര്‍ന്ന് ബൈക്ക് നിയന്ത്രണംവിട്ട് മറിയുകയായിരുന്നു. നവീകരണത്തിന്‍െറ ഭാഗമായി എം.സി റോഡില്‍ ഓട മൂടുന്നതിനായി റോഡരികില്‍ സ്ളാബുകള്‍ വാര്‍ത്തും സമീപത്തായി മെറ്റല്‍ കൂട്ടിയിട്ടിരിക്കുകയുമാണ്. ഈ ഭാഗത്ത് മുന്നറിയിപ്പ് ബോര്‍ഡുകള്‍ ഇല്ലാത്തതാണ് അപകടങ്ങള്‍ പെരുകാന്‍ കാരണമായത്. ഒരു മാസത്തിനിടെ ചെറുതും വലുതുമായ പത്തിലേറെ അപകടങ്ങളാണ് ഇവിടെ ഉണ്ടായത്. ബൈക്ക് യാത്രികരാണ് കൂടുതലായും അപകടത്തില്‍പെട്ടത്. എതിര്‍ദിശയില്‍ വരുന്ന വാഹനങ്ങള്‍ രാത്രി ഹെഡ്ലൈറ്റ് ഡിം ചെയ്യാതെ വരുമ്പോള്‍ ബൈക്ക് യാത്രികര്‍ക്ക് റോഡില്‍ കൂട്ടിയിട്ടിരിക്കുന്ന മെറ്റലും സ്ളാബുകളും കാണാന്‍ കഴിയുന്നില്ല.