നിരോധ ഉത്തരവ് മറികടന്ന് കുമാരനല്ലൂരില്‍ പാടം നികത്തല്‍

കോട്ടയം: കുമാരനല്ലൂര്‍ പ്രദേശത്ത് കരിയില്‍പാടം, പെരുമ്പായിക്കാട്, മുള്ളുശേരിക്കര തുടങ്ങിയ സ്ഥലങ്ങളില്‍ മണ്ണ് മാഫിയ അനധികൃതമായി തണ്ണീര്‍ത്തടങ്ങള്‍ മണ്ണിട്ട് നികത്തുന്നതായി പരാതി. പ്രദേശവാസികളുടെ നേതൃത്വത്തില്‍ ശക്തമായി പ്രതിഷേധിച്ചിട്ടും നിലംനികത്തല്‍ തുടരുകയാണെന്ന് കുടിവെള്ള തണ്ണീര്‍ത്തട സംരക്ഷണ സമിതി ജില്ലാ കമ്മിറ്റി ചൂണ്ടിക്കാട്ടി. സ്ഥലം സന്ദര്‍ശിച്ച കലക്ടര്‍ നിര്‍ത്താന്‍ ഉത്തരവ് നല്‍കിയിട്ടും നിലംനികത്തല്‍ തുടരുകയാണ്. ഇതിനെതിരെ നടപടി സ്വീകരിച്ചില്ളെങ്കില്‍ ശക്തമായ സമരപരിപാടികളുമായി മുന്നോട്ട് വരുമെന്ന് സമിതി അറിയിച്ചു. ജില്ലാ പ്രസിഡന്‍റ് എബി ഐപ്പ് അധ്യക്ഷത വഹിച്ചു. മുഹമ്മദ് അജിലാദ്, അമല്‍ ജി. പോള്‍, തോമസ് മാത്യു, സച്ചിന്‍ കൂരോപ്പട തുടങ്ങിയവര്‍ സംസാരിച്ചു.