ടീം രണ്ട്, പരിശീലകന്‍ ഒന്ന്

കാഞ്ഞിരപ്പള്ളി: ഫുട്ബാള്‍ മത്സരത്തില്‍ ഏറ്റുമുട്ടിയ ഇരു ടീമുകളുടെയും പരിശീലകന്‍ ഒരാള്‍. റവന്യൂ ജില്ലാ സ്കൂള്‍ ഗെയിംസില്‍ ഇന്നലെ സീനിയര്‍ പെണ്‍കുട്ടികളുടെ ഫുട്ബാള്‍ ഫൈനലില്‍ മത്സരത്തിനിറങ്ങിയ കുറവിലങ്ങാട് ഉപജില്ലാ ടീമിന്‍െറയും വൈക്കം ഉപജില്ലാ ടീമിന്‍െറയും പരിശീലകന്‍ ജോമോന്‍ ജേക്കബാണ്. തന്‍െറ ശിഷ്യര്‍ തമ്മില്‍ ഏറ്റുമുട്ടുമ്പോള്‍ ഇരുടീമും ജയിക്കണമെന്നാണ് ആഗ്രഹമെന്ന് ജേക്കബ് പറഞ്ഞു. സ്പോര്‍ട്സ് അതോറിറ്റി ഓഫ് ഇന്ത്യയുടെ എക്സറ്റന്‍ഷന്‍ സെന്‍ററായ മേവള്ളൂര്‍ കെ.എം.എച്ച്.എസിലെ പരിശീലകനാണ് ജോമോന്‍. കുറവിലങ്ങാട്, വൈക്കം ഉപജില്ലകളിലെ സ്കൂളുകളിലെ ഫുട്ബാള്‍ താരങ്ങള്‍ പരിശീലനം നേടുന്നത് ഇവിടെനിന്നാണ്. ഇരു ഉപജില്ലാ ടീമുകളിലെ കളിക്കാരും ഇതില്‍പ്പെടും. ഒടുവില്‍ ഫൈനലില്‍ കുറവിലങ്ങാട് രണ്ട് ഗോളുകള്‍ക്ക് വൈക്കത്തെ പരാജയപ്പെടുത്തി ചാമ്പ്യന്‍മാരായി.