കഞ്ചാവുമായി യുവാക്കള്‍ പിടിയില്‍

പൊന്‍കുന്നം: കഞ്ചാവ് കൈവശംവച്ച രണ്ടു യുവാക്കളെ പോലീസ് പൊന്‍കുന്നം ടൗണില്‍നിന്ന് പിടികൂടി. തൃശൂര്‍ ചാലക്കുടി സ്വദേശി തുരുത്തൂര്‍പാടത്ത് ആരോദഭവനില്‍ ഫെമിന്‍ (20), ഉടുമ്പന്‍ചോല കാമാക്ഷിപുരം പാലയ്ക്കാട്ടെ വീട്ടില്‍ ശ്രീജിത്ത്(18) എന്നിവരാണ് പിടിയിലായത്. പൊന്‍കുന്നം സി.ഐ ആര്‍. ജോസിന്‍െറ നേതൃത്വത്തില്‍ തിങ്കളാഴ്ച രാവിലെ നടത്തിയ വാഹനപരിശോധനയിലാണ് ഇവര്‍ കസ്റ്റഡിയിലായത്. ഇരുവരും എറണാകുളത്തെ സ്വകാര്യ സ്ഥാപനത്തില്‍ ജീവനക്കാരാണ്. കുമളിയില്‍നിന്ന് കഞ്ചാവുമായി പുതിയ ബൈക്കില്‍ എറണാകുളത്തേക്ക് പോകുംവഴി പൊലീസിന്‍െറ വലയിലാവുകയായിരുന്നു. വാഹനപരിശോധനയില്‍ സി.ഐക്കൊപ്പം എസ്.ഐമാരായ പി.സി. ജോസഫ്, അനില്‍കുമാര്‍, സീനിയല്‍ സിവില്‍ പൊലീസ് ഓഫിസര്‍ ബിനു, സി.പി.ഒമാരായ ഷിയാസ്, സിബി എന്നിവരുമുണ്ടായിരുന്നു. പ്രതികളെ കാഞ്ഞിരപ്പള്ളി കോടതിയില്‍ ഹാജരാക്കി.