ദേശീയപാതയിലെ കുഴികള്‍; പഞ്ചായത്ത് ഭരണസമിതി റോഡ് ഉപരോധിച്ചു

കിഴക്കേ കല്ലട: ദേശീയപാത വകുപ്പിന്‍െറയും കരാറുകാരന്‍െറയും അനാസ്ഥയില്‍ പ്രതിഷേധിച്ചും ദേശീയപാതയിലെ അപകടക്കുഴികള്‍ക്ക് പരിഹാരം കാണണമെന്ന് ആവശ്യപ്പെട്ടും കിഴക്കേ കല്ലട പഞ്ചായത്ത് സമിതി കൊല്ലം- തേനി ദേശീയപാതയുടെ മാര്‍ത്താണ്ഡപുരം ഭാഗം ഉപരോധിച്ചു. ഭരണിക്കാവ് മുതല്‍ കടപുഴ പാലം വരെയുള്ള ഭാഗത്തെ റോഡ് വികസനവും ടീറാറിങ്ങും പൂര്‍ത്തീകരിച്ചെങ്കിലും പാലത്തിനപ്പുറം കിഴക്കേ കല്ലട പഞ്ചായത്തിലൂടെ പാത കടന്നുപോകുന്ന ഭാഗത്തെ നിര്‍മാണ പ്രവര്‍ത്തനം ഇനിയും ആരംഭിച്ചിട്ടില്ല.കരാറുകാരനും ഉദ്യോഗസ്ഥരും തമ്മിലെ ഒത്തുകളി അവസാനിപ്പിക്കണമെന്നും പാതയുടെ നിര്‍മാണം ഉടന്‍ ആരംഭിക്കണമെന്നും ആവശ്യപ്പെട്ടായിരുന്നു ഉപരോധം.പഞ്ചായത്ത് പ്രസിഡന്‍റ് എന്‍. വിജയന്‍ ഉദ്ഘാടനം ചെയ്തു. വൈസ് പ്രസിഡന്‍റ് മേരിക്കുട്ടി, പഞ്ചായത്ത് അംഗങ്ങളായ പി. ഉഷാദേവി, അനില്‍ ജോര്‍ജ്, കുമാരി സച്ചു, യമുന ഷാഹി, മേരിക്കുട്ടി ജോയി, സുമ കിണറ്റിന്‍ മൂട്ടില്‍, എസ്. ശശികല, കെ. രാധാമണി, ജെ. ക്ളീറ്റസ്, പാച്ചന്‍ തുടങ്ങിയവര്‍ ഉപരോധത്തില്‍ പങ്കെടുത്തു.