വ്യാജമദ്യദുരന്ത സാധ്യത: പരിശോധന ശക്തമാക്കും

കൊല്ലം: തെരഞ്ഞെടുപ്പിനോടനുബന്ധിച്ച് വ്യാജമദ്യത്തിന്‍െറ ഒഴുക്കുണ്ടാവുമെന്നും മദ്യദുരന്തത്തിന് സാധ്യതയുണ്ടെന്നുമുള്ള സ്റ്റേറ്റ് ഇന്‍റലിജന്‍സ് റിപ്പോര്‍ട്ടിന്‍െറ അടിസ്ഥാനത്തില്‍ പരിശോധന ശക്തമാക്കണമെന്ന് കലക്ടര്‍. ഇതുസംബന്ധിച്ച പൊലീസ്-എക്സൈസ്-ഫോറസ്റ്റ്-റവന്യൂ ഉദ്യോഗസ്ഥരുടെ യോഗത്തില്‍ അധ്യക്ഷത വഹിക്കുകയായിരുന്നു അവര്‍. ബിയര്‍-വൈന്‍ പാര്‍ലറുകളിലെ പരിശോധനയുടെ തോത് വര്‍ധിപ്പിക്കണം. അതിര്‍ത്തിവഴിയുള്ള വ്യാജമദ്യത്തിന്‍െറ ഒഴുക്കുതടയാന്‍ പ്രത്യേക പരിശോധനാസംഘത്തെ നിയോഗിക്കണം. ആര്യങ്കാവ് വഴിയുള്ള വാഹനങ്ങളെ കൂടുതല്‍ നിരീക്ഷണത്തിന് വിധേയമാക്കണം. സാധാരണ പരിശോധനകള്‍ക്ക് പുറമേ പ്രത്യേക അന്വേഷണസംഘങ്ങളെ ഉപയോഗപ്പെടുത്തി പരിശോധന കുറ്റമറ്റതാക്കണം. പൊലീസ്-എക്സൈസ്-ഫോറസ്റ്റ്-റവന്യൂ ഉദ്യോഗസ്ഥരുടെ സംയുക്തപരിശോധന നടത്തണമെന്നും കലക്ടര്‍ ആവശ്യപ്പെട്ടു.