ഹൈകോടതി വിധി ലംഘിച്ച് ഖനനം; വാട്ടര്‍ ടാങ്ക് തകര്‍ച്ചയില്‍

ഓയൂര്‍: കരീപ്ര പഞ്ചായത്തിലെ കല്‍ച്ചിറയില്‍ ഹൈകോടതി വിധി ലംഘിച്ചുള്ള പാറഖനനം മൂലം വാട്ടര്‍ ടാങ്ക് അപകടാവസ്ഥയില്‍. ഈ ടാങ്കിന്‍െറ സമീപം നിരവധി കുടുംബങ്ങളാണ് താമസിക്കുന്നത്. ജില്ലാ പരിസ്ഥിതി ഏകോപനസമിതിയും നാട്ടുകാരും സംയുക്തമായി വിജിലന്‍സ് അധികൃതര്‍ക്ക് ഇതു സംബന്ധിച്ച് പരാതി നല്‍കിയിരുന്നു. അനധികൃത ഖനനം മൂലം വാട്ടര്‍ ടാങ്ക് അപകടാവസ്ഥയിലാണെന്ന വിജിലന്‍സ് റിപ്പോര്‍ട്ട് വകുപ്പുമന്ത്രിക്കും ലഭിച്ചിരുന്നു. എന്നാല്‍, ഒരുനടപടിയും ഉണ്ടായില്ല. ഇപ്പോഴും പാറഖനനം തുടരുന്നു. കരീപ്രയിലെ എല്ലാ വാര്‍ഡുകളിലേക്കും കുടിവെള്ളമത്തെിക്കുന്നത് ഈ വാട്ടര്‍ ടാങ്കില്‍നിന്നാണ്. വാട്ടര്‍ ടാങ്ക് തകര്‍ന്നാല്‍ വന്‍ ദുരന്തമാണ് സംഭവിക്കുകയെന്നും അതിനാല്‍ അധികാരികള്‍ അടിയന്തരമായി നടപടികള്‍ സ്വീകരിക്കണമെന്നുമുള്ള നാട്ടുകാരുടെ ആവശ്യം ശക്തമാണ്.