ഓപറേഷന്‍ കോമ്പിങ്ങില്‍ പിടിയിലായത് 260 പേര്‍

കൊല്ലം: ജില്ലാ പൊലീസ് മേധാവിയുടെ നിര്‍ദേശപ്രകാരം സിറ്റി പൊലീസ് സംയുക്തമായി നടത്തിയ ഓപറേഷന്‍ കോമ്പിങ്ങില്‍ മദ്യപിച്ച് വാഹനമോടിച്ച കേസില്‍ ശനിയാഴ്ച രാത്രി പിടിയിലായത് 260 പേര്‍. സിറ്റിയിലെ 18 സ്റ്റേഷനുകളില്‍നിന്നുള്ള പൊലീസ് സംഘമാണ് വിവിധയിടങ്ങളില്‍ വ്യാപകമായ വാഹനപരിശോധന നടത്തിയത്. ഗതാഗത നിയമങ്ങള്‍ ലംഘിച്ചും മതിയായ രേഖകളില്ലാതെയും യാത്രചെയ്ത 1273പേരില്‍നിന്നും പിഴ ഈടാക്കി. റോഡില്‍നിന്ന് മദ്യപിച്ച് അസഭ്യം പറയുകയും ബഹളംവെക്കുകയും ചെയ്ത 89 പേരെ കസ്റ്റഡിയിലെടുത്തു. കഞ്ചാവ് മറ്റു ലഹരി ഉല്‍പന്നങ്ങള്‍ എന്നിവ കൈവശം വെച്ച കേസില്‍ 65 കേസുകള്‍ രജിസ്റ്റര്‍ ചെയ്തു. വാറന്‍റ് കേസില്‍ ഉള്‍പ്പെട്ട 16 പേരെയാണ് പുലര്‍ച്ചയോടെ അറസ്റ്റ് ചെയ്തത്. എല്ലാമാസവും തെരഞ്ഞെടുക്കുന്ന ഒരുദിവസമാണ് ഓപറേഷന്‍ കോമ്പിങ് നടത്തുന്നത്. വൈകീട്ട് അഞ്ചുമുതല്‍ പുലര്‍ച്ചെ രണ്ടുവരെയാണ് പരിശോധന. ചില ദിവസങ്ങളില്‍ നേരം പുലരുംവരെ പരിശോധന നീളും. പിടികൂടിയതില്‍ ഭൂരിഭാഗവും ഇരുചക്രവാഹനങ്ങളാണ്. കൊല്ലം ഈസ്റ്റ്, പള്ളിത്തോട്ടം, വെസ്റ്റ്, ശക്തികുളങ്ങര, അഞ്ചാലുംമൂട്, ട്രാഫിക്, ഇരവിപുരം, കിളികൊല്ലൂര്‍, ചാത്തന്നൂര്‍, കൊട്ടിയം, പരവൂര്‍, പാരിപ്പള്ളി, കരുനാഗപ്പള്ളി, ഓച്ചിറ, ചവറ, തെക്കുംഭാഗം തുടങ്ങിയ സ്റ്റേഷനുകളുടെ നേതൃത്വത്തിലാണ് പരിശോധന നടന്നത്. ഗതാഗത നിയമലംഘനം, സംശയം തോന്നുന്ന ലോഡ്ജുകളുടെയും വീടുകളുടെയും പരിശോധന, വാറന്‍റ് ലഭിച്ചിട്ടും ഹാജരാകാത്ത പ്രതികള്‍ക്കായുള്ള മിന്നല്‍പരിശോധന എന്നിവയെല്ലാം ഓപറേഷന്‍ കോമ്പിങ്ങിന്‍െറ ഭാഗമായി നടക്കുമെന്ന് കമീഷണര്‍ അറിയിച്ചു.