കാലവര്‍ഷക്കെടുതി: ഉപകരണങ്ങള്‍ നൽകി

കൊച്ചി: മഴക്കാല ദുരിതാശ്വാസ പ്രവർത്തനം ഏകോപിപ്പിക്കുന്നതിന് ജില്ലയിലെ റവന്യൂ ഉദ്യോഗസ്ഥര്‍ക്കാവശ്യമായ വിവിധ സഹായ ഉപകരണങ്ങള്‍ വിതരണം ചെയ്തു. റവന്യൂ ജീവനക്കാര്‍ക്ക് ആത്മവിശ്വാസം ഉറപ്പാക്കുന്ന വിധം എല്ലാ വില്ലേജിലും ആവശ്യമായ ജീവന്‍രക്ഷാ ഉപകരണങ്ങളും ഉടന്‍ ലഭ്യമാക്കുമെന്ന് സഹായ ഉപകരണങ്ങളുടെ വിതരണം ഉദ്ഘാടനം ചെയ്ത കലക്ടര്‍ എസ്. സുഹാസ് അറിയിച്ചു. മഴക്കോട്ടുകള്‍, ടോര്‍ച്ച്, ഗം ബൂട്ടുകള്‍ തുടങ്ങിയവയാണ് ലഭ്യമാക്കുന്നത്. ജൂലൈയോടെ വില്ലേജുകളില്‍ ചെറുവഞ്ചികള്‍ ഉള്‍പ്പെടെയുള്ളവ ലഭ്യമാക്കും. ജീവനക്കാര്‍ക്ക് പ്രത്യേക പരിശീലനവും നൽകും. കലക്ടറേറ്റിൽ എ.ഡി.എം സാബു കെ. ഐസക്കിൻെറ അധ്യക്ഷതയില്‍ നടന്ന ചടങ്ങില്‍ സബ് കലക്ടര്‍ സ്‌നേഹില്‍കുമാര്‍ സിങ് കലക്ടറില്‍നിന്ന് ആദ്യമായി സഹായ ഉപകരണങ്ങൾ ഏറ്റുവാങ്ങി.