കളമശ്ശേരി വോട്ടർപട്ടികയിൽ സ്​ത്രീകൾ കൂടുതൽ

കളമശ്ശേരി: തദ്ദേശസ്വയംഭരണ സ്ഥാപനങ്ങളിലെ വോട്ടർപട്ടിക പ്രസിദ്ധീകരിച്ചതിൽ നഗരസഭയിലെ 42 വാർഡുകളിലും കൂടുതൽ സ്ത്രീവോട്ടർമാർ. 25,611 പുരുഷ വോട്ടർമാരും 27,148 സ്ത്രീ വോട്ടർമാരുമാണുള്ളത്. ആകെ 52,759 പേരാണുള്ളത്. 2015ലെ വോട്ടർ പട്ടികയിലേതിനെക്കാൾ 3272 വോട്ടർമാർ കുടുതലാണ്. 42 വാർഡുകളിലെയും അന്തിമ വോട്ടർപട്ടിക കലക്ടറേറ്റ്, വില്ലജ് ഓഫിസ്, താലൂക്ക് ഓഫിസ്, നഗരസഭ നോട്ടീസ് ബോർഡ് പോളിങ് സ്റ്റേഷനുകൾ എന്നിവിടങ്ങളിലും നഗരസഭ വെബ്സൈറ്റിലും പ്രസിദ്ധീകരിച്ചതായി ഇലക്ടറൽ രജിസ്ട്രേഷൻ ഓഫിസർ അറിയിച്ചു. മദ്യപിച്ചത് ചോദ്യംചെയ്ത സുരക്ഷ ജീവനക്കാരന് മർദനം. കളമശ്ശേരി: മദ്യപിച്ചത് ചോദ്യംചെയ്ത കൊച്ചി സർവകലാശാല സുരക്ഷ ജീവനക്കാരന് മർദനം. കുലശേഖരപുരം മുണ്ടയ്ക്കൽ വീട്ടിൽ അനിൽകുമാറിനെയാണ് (52) സർവകലാശാല കാമ്പസിനു സമീപം മദ്യപിക്കുകയായിരുന്ന രണ്ടുപേർ ചേർന്ന് മർദിച്ചത്. മുഖത്ത് പരിക്കേറ്റ ജീവനക്കാരൻ സ്വകാര്യ ആശുപത്രിയിൽ ചികിത്സ തേടി. പൊലീസ് കേസെടുത്തു. ചൊവ്വാഴ്ച രാത്രി 10.30നാണ് സംഭവം.