ലോറി ഡ്രൈവർക്ക് സ്വന്തം ഉച്ചഭക്ഷണം നൽകി പൊലീസുകാരൻ

മട്ടാഞ്ചേരി: കഴിക്കാന്‍ വീട്ടില്‍നിന്ന് കൊണ്ടുവന്ന ഭക്ഷണം വിശന്ന് വലഞ്ഞ ലോറി ഡ്രൈവര്‍ക്ക് നല്‍കി സിവില്‍ പൊലീസ് ഓഫിസര്‍. തോപ്പുംപടിയില്‍ ലോക്ക് ഡൗണ്‍ ഡ്യൂട്ടിക്ക് നിയോഗിക്കപ്പെട്ട കൊച്ചി സിറ്റി പൊലീസിലെ യേശുദാസാണ് വിശന്നെത്തിയയാൾക്ക് തുണയായത്. പത്ത് ദിവസമാണ് യേശുദാസിന് തോപ്പുംപടിയില്‍ ഡ്യൂട്ടി. വീട്ടില്‍ നിന്നുകൊണ്ട് വരുന്ന ഭക്ഷണമാണ് കഴിക്കുന്നത്. ഉച്ച സമയത്ത് തോപ്പുംപടിയിലൂടെ ലോറിയുമായി പോയ ഡ്രൈവറുടെ മുഖം ശ്രദ്ധിച്ചപ്പോള്‍ തന്നെ ഒന്നും കഴിച്ചിട്ടില്ലെന്ന് മനസ്സിലായി. ക്ഷീണാവസ്ഥ കണക്കിലെടുത്ത് വല്ലതും കഴിച്ചോയെന്ന ചോദ്യത്തിന് ഡ്രൈവര്‍ ഇല്ലെന്ന് മറുപടി നല്‍കിയതോടെ തൻെറ ഭക്ഷണപ്പൊതി ഡ്രൈവര്‍ക്ക് നല്‍കുകയായിരുന്നു. ഇതുകണ്ട നാട്ടുകാരില്‍ ചിലര്‍ നല്‍കിയ പഴമാണ് യേശുദാസ് പിന്നീട് കഴിച്ചത്.