കാണാതായ മൂന്ന്​ കുഞ്ഞുങ്ങളെ മാതാപിതാക്കൾക്ക്​ തിരിച്ചുകിട്ടി

ന്യൂഡൽഹി: ഡൽഹിയിലെ ജഹാംഗിർപുരി മേഖലയിലെ വീടുകളിൽനിന്നും രണ്ടുദിവസം മുമ്പ് കാണാതായ മൂന്ന് പെൺകുഞ്ഞുങ്ങൾ മാതാപിതാക്കളുടെയടുത്ത് തിരികെയെത്തി. മൂന്നു വയസ്സ് മാത്രമുള്ള വാനിഷ, അനീഷ്ന, ദീവൻഷി എന്നിവരെയാണ് പൊലീസ് കണ്ടെത്തിയത്. എന്നാൽ, വീട്ടുകാരുടെ പേരുവിവരങ്ങൾ പൊലീസിനു പറഞ്ഞുകൊടുക്കാൻ കുട്ടികൾക്കായില്ല. തുടർന്ന് വിവിധ പൊലീസ് ഗ്രൂപുകളിലൂടെ വിവരം കൈമാറി മാതാപിതാക്കളിൽ എത്തിക്കുകയായിരുന്നു. വിവരങ്ങൾ സ്ഥിരീകരിച്ച പൊലീസ് കുഞ്ഞുങ്ങളെ മാതാപിതാക്കൾക്ക് കൈമാറി. എല്ലാവരും ജഹാംഗിർപുരി മേഖലയിൽ ഉള്ളവരാണ്. എന്നാൽ, കുട്ടികളെ കാണാതായ സാഹചര്യം സംബന്ധിച്ച് കൂടുതൽ വിവരങ്ങൾ ലഭ്യമല്ല.