എം.ജിയിൽ രജിസ്ട്രാർ, പരീക്ഷ കൺട്രോളർ, ഫിനാൻസ് ഓഫിസർ തസ്തികയിലേക്ക് ഡെപ്യൂട്ടേഷൻ നിയമനം

കോട്ടയം: എം.ജി സർവകലാശാലയിലെ രജിസ്ട്രാർ, പരീക്ഷ കൺട്രോളർ, ഫിനാൻസ് ഓഫിസർ തസ്തികയിലേക്ക് ഡെപ്യൂട്ടേഷൻ നിയമനത ്തിനു വിജ്ഞാപനമായി. സംസ്ഥാന/കേന്ദ്ര സർക്കാർ സർവിസിലുള്ള യോഗ്യരായവരിൽനിന്ന് ഓൺലൈൻ മുഖേനയാണ് അപേക്ഷ സ്വീകരിക്കുന്നത്. ചുമതലയേൽക്കുന്ന ദിവസം മുതൽ നാലുവർഷം വരെയോ 56 വയസ്സ് തികയുന്നതുവരെയോ ഏതാണോ ആദ്യം സംഭവിക്കുന്നത് അതുവരെയാണ്‌ കാലാവധി. രജിസ്ട്രാർക്കും പരീക്ഷ കൺട്രോളർക്കും ഒന്നാം/രണ്ടാം ക്ലാസ് ബിരുദാനന്തര ബിരുദം/തത്തുല്യം, സർവകലാശാലയിലോ കോളജ് തലത്തിലോ 10 വർഷത്തെ അധ്യാപന പരിചയം, ഉത്തരവാദിത്തപ്പെട്ട പദവിയിൽ അഞ്ചുവർഷത്തെ ഭരണ പരിചയം എന്നിവയാണ് യോഗ്യത. പ്രായം: 2019 ജനുവരി ഒന്നിന് 45 വയസ്സിൽ കുറയാനോ 52 വയസ്സിൽ കൂടാനോ പാടില്ല. ഫിനാൻസ് ഓഫിസർക്ക് ഇൻസ്റ്റിറ്റ്യൂട്ട് ഓഫ് ചാർട്ടേഡ് അക്കൗണ്ടൻറ്സിൽ അസോസിയേറ്റ് അംഗം, സി.എ അല്ലെങ്കിൽ തത്തുല്യം പാസായശേഷം അഞ്ചുവർഷത്തെ പ്രവൃത്തി പരിചയം എന്നിവയാണ് യോഗ്യത. പ്രായം: 2019 ജനുവരി ഒന്നിന് 45 വയസ്സിൽ കുറയാനോ 52 വയസ്സിൽ കൂടാനോ പാടില്ല. www.mgu.ac.in വെബ്‌സൈറ്റിലൂടെ ജൂലൈ മൂന്നുമുതൽ ഓൺലൈനായി അപേക്ഷ സമർപ്പിക്കാം. ആഗസ്റ്റ് രണ്ടിന് രാത്രി 11.59വരെയാണ് സമയം. അപേക്ഷ, സർട്ടിഫിക്കറ്റുകളുടെ സാക്ഷ്യപ്പെടുത്തിയ പകർപ്പ്, യോഗ്യതപത്രം, പ്രായം, യോഗ്യത, പ്രവൃത്തി പരിചയം എന്നിവ തെളിയിക്കുന്ന രേഖകൾ എന്നിവയുടെ നാലുസെറ്റ് പകർപ്പുകൾ ഡെപ്യൂട്ടി രജിസ്ട്രാർ II (ഭരണവിഭാഗം), എം.ജി സർവകലാശാല, പ്രിയദർശിനി ഹിൽസ് പി.ഒ, കോട്ടയം -686 560 വിലാസത്തിൽ ആഗസ്റ്റ് ഒമ്പതിന് മുമ്പ് നൽകണം. സർവകലാശാലകൾ, സർക്കാർ/അഫിലിയേറ്റഡ് കോളജുകൾ എന്നിവിടങ്ങളിൽ ജോലി ചെയ്യുന്നവർ തൊഴിൽ ദാതാവിൽനിന്ന് നോൺ ഒബ്ജക്ഷൻ സർട്ടിഫിക്കറ്റ് അപേക്ഷക്കൊപ്പം നൽകണം.