ശിശുവികസന പദ്ധതി ഓഫിസര്‍മാര്‍ വിരമിക്കുന്നു

അങ്കമാലി: സംസ്ഥാന വനിത ശിശുവികസന വകുപ്പിന് കീഴില്‍ പ്രവര്‍ത്തിക്കുന്ന ശിശുവികസന പദ്ധതിയുടെ മേധാവികള്‍ വിരമി ക്കുന്നു. അങ്കമാലി പ്രോജക്ടിലെ ഓഫിസര്‍ പി.എസ്. ഇന്ദിര, അങ്കമാലി അഡീഷനല്‍ പ്രോജക്ടിലെ ഓഫിസര്‍ പി.എം. ശ്യാമള എന്നിവര്‍ 30 വര്‍ഷത്തെ സർവിസിനുശേഷം വെള്ളിയാഴ്ച വിരമിക്കും. കറുകുറ്റി, മൂക്കന്നൂര്‍, മഞ്ഞപ്ര, മലയാറ്റൂര്‍, അയ്യമ്പുഴ പഞ്ചായത്തുകളിലെ 101 അംഗന്‍വാടികളാണ് അങ്കമാലി പ്രോജക്ടിലുള്ളത്. അങ്കമാലി നഗരസഭയിലെയും കാലടി, കാഞ്ഞൂര്‍, തുറവൂര്‍ പഞ്ചായത്തുകളിലെയും 101 അംഗൻവാടികളാണ് അങ്കമാലി അഡീഷനല്‍ പ്രോജക്ടിലുള്ളത്. പി.എസ്. ഇന്ദിര 2015 ലും പി.എം. ശ്യാമള 2011ലുമാണ് അങ്കമാലിയില്‍ ചുമതലയേറ്റത്. ബ്ലോക്ക് പഞ്ചായത്തിൻെറ നേതൃത്വത്തില്‍ സി.എസ്.എ ഓഡിറ്റോറിയത്തില്‍ യാത്രയയപ്പ് സമ്മേളനം സംഘടിപ്പിച്ചു. പ്രസിഡൻറ് പി.ടി. പോള്‍ അധ്യക്ഷത വഹിച്ചു. റോജി എം. ജോണ്‍ എം.എല്‍.എ ഉപഹാരങ്ങള്‍ സമ്മാനിച്ചു. നഗരസഭ അധ്യക്ഷ എം.എ. ഗ്രേസി മുഖ്യാതിഥിയായി.