നഴ്സുമാർക്ക് കാല്‍മുട്ട് മാറ്റിവെക്കല്‍ ശസ്ത്രക്രിയ

കൊച്ചി: റോട്ടറി സ്മാര്‍ട്ട് സിറ്റിയും ആസ്റ്റര്‍ മെഡ്സിറ്റിയും ആസ്റ്റര്‍ ഡി.എം. ഫൗണ്ടേഷനും ചേര്‍ന്ന് 25 നഴ്‌സുമാര്‍ക്ക് കുറഞ്ഞ ചെലവിൽ കാല്‍മുട്ട് മാറ്റിവെക്കല്‍ ശസ്ത്രക്രിയ ചെയ്തുനല്‍കുമെന്ന് ഭാരവാഹികള്‍ വാര്‍ത്തസമ്മേളനത്തില്‍ പറഞ്ഞു. 75,000 രൂപ നിരക്കിലാണ് ശസ്ത്രക്രിയ ചെയ്തുനല്‍കുക. എ ഹാന്‍ഡ് ടു വോക്ക് പദ്ധതി പ്രകാരം ഇപ്പോള്‍ സേവനമനുഷ്ഠിക്കുന്നവരോ വിരമിച്ചവരോ ആയ നഴ്‌സുമാരെയും അവരുടെ അടുത്ത ബന്ധുക്കളെയും ശസ്ത്രക്രിയക്ക് പരിഗണിക്കും. അര്‍ഹരായവരെ തെരഞ്ഞെടുക്കുന്നതിന് ശനിയാഴ്ച റോട്ടറി ബാലഭവനില്‍ ക്യാമ്പ് നടക്കും. രാവിലെ പത്തുമുതല്‍ വൈകീട്ട് നാലുവരെയാണ് ക്യാമ്പ്. പ്രസിഡൻറ് അനൂപ് മേനോന്‍, ചെയര്‍മാന്‍ ടോമി സക്കറിയ, സര്‍ജന്‍ ഇന്‍ചാര്‍ജ് ഡോ. ബിജു ജോര്‍ജ് എന്നിവര്‍ വാര്‍ത്തസമ്മേളനത്തില്‍ പങ്കെടുത്തു.