ഇസാഫ് സ്​മോൾ ഫിനാൻസ്​ ബാങ്കിന് യൂറോപ്യൻ പുരസ്കാരം

കൊച്ചി: ഇസാഫ് സ്മോൾ ഫിനാൻസ് ബാങ്കിന് 2018ലെ യൂറോപ്യൻ മൈേക്രാ ഫിനാൻസ് പുരസ്കാരം. സാങ്കേതികവിദ്യ ഉപയോഗിച്ച് സാമ്പത്തിക ഉൾപ്പെടുത്തൽ പദ്ധതി വിപുലീകരിച്ച സ്ഥാപനങ്ങൾക്ക് നൽകുന്ന പുരസ്കാരമാണ് ലഭിച്ചത്. അവസാന റൗണ്ടിൽ രണ്ടാംസ്ഥാനമാണ് ബാങ്ക് കരസ്ഥമാക്കിയത്. പതിനായിരം യൂറോയാണ് സമ്മാനം. ലക്സംബർഗിൽ നടന്ന യൂറോപ്യൻ മൈേക്രാ ഫിനാൻസ് വീക്കിൽ ഇസാഫ് സ്മോൾ ഫിനാൻസ് ബാങ്ക് എം.ഡിയും സി.ഇ.ഒയുമായ കെ. പോൾ തോമസ് അവാർഡ് ഏറ്റുവാങ്ങി. 12 സംസ്ഥാനങ്ങളിലായി 23 ലക്ഷം വനിതകളെ ടാബ് അധിഷ്ഠിത സാങ്കേതികവിദ്യയിലൂടെ സാമ്പത്തിക ഉൾപ്പെടുത്തൽ പദ്ധതിയുടെ ഭാഗമാക്കിയതാണ് ബാങ്കിന് നേട്ടമായത്. ഐവറികോസ്റ്റിലെ അഡ്വാൻസ് സി.ഐക്കാണ് ഒന്നാംസ്ഥാനം. ഒരുലക്ഷം യൂറോയാണ് അവാർഡ് തുക. 22 രാജ്യങ്ങളിൽനിന്നായി 27ഓളം സ്ഥാപനങ്ങളെയാണ് അവാർഡിനായി നിർദേശിച്ചിരുന്നത്.