കൂത്താട്ടുകുളത്ത് ബസും തടിലോറിയും കൂട്ടിയിടിച്ച്​ 25 പേർക്ക് പരിക്ക്​

കൂത്താട്ടുകുളം: എം.സി റോഡിൽ കരിമ്പ പാലത്തിന് സമീപം കെ.എസ്.ആർ.ടി.സി സൂപ്പർ ഫാസ്റ്റ് ബസും തടിലോറിയും കൂട്ടിയിടിച്ച് 25 പേർക്ക് പരിക്ക്. ചെവ്വാഴ്ച വൈകീട്ട് 6.30ഒാടെയാണ് അപകടം നടന്നത്. മൂവാറ്റുപുഴ ഭാഗത്തുനിന്ന് വന്ന ബസ് എതിരെ വന്ന തടിലോറിയിൽ ഇടിച്ചുകയറുകയായിരുന്നു. ഇടിയുടെ ആഘാതത്തിൽ മിക്കവരുടെയും മുഖത്തിനും കൈകാലുകൾക്കുമാണ് പരിക്ക്. പരിക്കേറ്റവരെ കൂത്താട്ടുകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ല. നാലുപേരാണ് ഇപ്പോൾ ചികിത്സയിലുള്ളത്. മറ്റുള്ളവർ പ്രഥമശുശ്രൂഷക്കുശേഷം ആശുപത്രിവിട്ടു.