പാടശേഖരങ്ങളിൽ മത്സ്യകൃഷി അവസാനിച്ചു; ഇനി നെൽകൃഷിയുടെ കാലം

അരൂർ: മണ്ഡലത്തിലെ പാടശേഖരങ്ങളിൽ മത്സ്യകൃഷിയുടെ കാലാവധി അവസാനിച്ചു. ഇനി നെൽകൃഷി ആരംഭിക്കാനുള്ള ഒരുക്കം. പാടശേഖരങ്ങളിൽ വെള്ളം വറ്റിച്ചുതുടങ്ങി. തുറവൂർ കരി, ചെമ്പകശേരിക്കരി, കോടംതുരുത്ത് പഞ്ചായത്ത് പരിധിയിലെ ചങ്ങരം പാടശേഖരം എന്നിവിടങ്ങളിലാണ് നെൽകൃഷിക്ക് ഒരുക്കം തുടങ്ങിയത്. പൊക്കാളികൃഷിക്ക് അനുയോജ്യ പാടശേഖരമാണ് മണ്ഡലത്തിലുള്ളത്. ആഴമേറിയ പാടമായതിനാൽ ചളിയാണ്. ദിവസങ്ങളോളം വെള്ളം വറ്റിച്ച് പാടം ഉണക്കണം. മഴ ലഭിച്ച് തുടങ്ങിയപ്പോൾ പെയ്ത്തുവെള്ളം കെട്ടി നിർത്തി പാടശേഖരങ്ങളിൽനിന്ന് വെള്ളമിറക്കി വിടും. ഇതോടെ ഉപ്പുവെള്ളത്തി​െൻറ കാഠിന്യം കുറയും. ഈ വെള്ളം പമ്പ് ചെയ്ത് പാടശേഖരങ്ങളിൽനിന്ന് നീക്കും. ജൂൺ പകുതിയോടെ പാടശേഖരങ്ങളിൽ വിത്ത് വിതക്കും. ചെട്ടിവിരുപ്പ്, ഉമ, വെറ്റില -2, ജ്യോതി നെല്ലുകളാണ് കൃഷിയിറക്കുന്നത്. വിത്ത്, വളം, കുമ്മായം എന്നിവ കൃഷിഭവൻ വഴി ലഭിക്കും. ഇതിന് പുറമെ പട്ടണക്കാട് ബ്ലോക്ക് പഞ്ചായത്ത്, പട്ടണക്കാട്, തുറവൂർ, കുത്തിയതോട്, കോടംതുരുത്ത്, എഴുപുന്ന ഗ്രാമപഞ്ചായത്തുകളും നെൽകൃഷിക്കായി പ്രത്യേക ഫണ്ട് നീക്കിവെച്ചിട്ടുണ്ട്. രാഗം ആർട്സ് പുനഃസംഘടിപ്പിച്ചു അരൂക്കുറ്റി: അരൂക്കുറ്റി രാഗം ആർട്സ് പുനഃസംഘടിപ്പിച്ചു. യോഗത്തിൽ സ്ഥാപകരിലൊരാളായ ഇ.വി. രാജേന്ദ്രൻ അധ്യക്ഷത വഹിച്ചു. അരൂക്കുറ്റിയുടെ സമഗ്ര വികസനത്തിന് വേഗം കൂട്ടാനുള്ള കർമപരിപാടിക്ക് യോഗം രൂപംനൽകി. ആർ. വിജയകുമാർ ആമുഖപ്രഭാഷണം നടത്തി. സി.ബി. വിമൽകുമാർ, ടി.എം. അജയകുമാർ, സുരേഷ്കുമാർ ഇടലയിൽ, ധനരാജൻ, എൻ. പുരുഷോത്തമൻ, ജയകുമാർ ചക്കംതുരുത്ത്, ആർ. രമേശൻ തുടങ്ങിയവർ സംസാരിച്ചു. ഹരിദാസ് ഇടലയിൽ സ്വാഗതവും സുന്ദരേശൻ നന്ദിയും പറഞ്ഞു. ഭാരവാഹികൾ: ഇ.വി. രാജേന്ദ്രൻ (പ്രസി), ധനരാജൻ (വൈസ് പ്രസി), ആർ. വിജയകുമാർ (സെക്ര), ടി.എം. അജയകുമാർ (ജോ. സെക്ര), സി.ബി. വിമൽകുമാർ (ട്രഷ). അഖിലഭാരത പര്യടന ബസ് യാത്ര നാളെ ആലപ്പുഴയിൽ ആലപ്പുഴ: എ​െൻറ ഭാരതം സ്വർണിമ ഭാരതം -ഉജ്ജ്വല ഭാരതത്തിനായി യുവശക്തി എന്ന സന്ദേശം ഉയർത്തി പ്രജാപിത ബ്രഹ്മകുമാരീസ് ഈശ്വര വിദ്യാലയത്തി​െൻറ അഖിലഭാരത പര്യടന ബസ് യാത്രക്ക് ശനിയാഴ്ച ജില്ലയിൽ സ്വീകരണം നൽകുമെന്ന് ഭാരവാഹികൾ വാർത്തസമ്മേളനത്തിൽ അറിയിച്ചു. രാവിലെ ഏഴിന് പഴവീട്ടിൽനിന്ന് തിരിക്കുന്ന യാത്ര ആലപ്പുഴ ഡിവൈ.എസ്.പി പി.വി. ബേബി ഫ്ലാഗ്ഓഫ് ചെയ്യും. തുടർന്ന് 13 കേന്ദ്രങ്ങളിൽ സ്വീകരണം ഒരുക്കും. വാർത്തസമ്മേളനത്തിൽ ബ്രഹ്മകുമാരീസ് ഡയറക്ടർ ബി.കെ. ദിൽഷ, അരവിന്ദാക്ഷൻ, ബി.കെ. വിദ്യ, രാമചന്ദ്രൻ, വിനോദ് എന്നിവർ പങ്കെടുത്തു.