യന്ത്രത്തകരാർ; ഗുരുവായൂര്‍ പാസഞ്ചര്‍ വൈകി

ആലുവ: ഗുരുവായൂര്‍-എറണാകുളം പാസഞ്ചര്‍ വെള്ളിയാഴ്ച മൂന്ന് മണിക്കൂർ വൈകി. രാവിലെയാണ് യന്ത്രത്തകരാർ മൂലം പാസഞ്ചറി​െൻറ യാത്ര പാതിവഴിയില്‍ നിലച്ചത്. രാവിലെ 8.25നാണ് ട്രെയിൻ ആലുവയിലെത്തേണ്ടത്. എന്നാല്‍, എൻജിന്‍ തകരാര്‍ പരിഹരിച്ച് 11.30 ഓടെയാണ് എത്തിയത്. ആലുവയില്‍ പാസഞ്ചര്‍ കാത്തുനിന്ന സ്‌ഥിരം യാത്രക്കാര്‍ ഇതോടെ ദുരിതത്തിലായി. ട്രെയിൻ വൈകുമെന്നറിയിച്ചതോടെ മറ്റ് വാഹനങ്ങളെ ആശ്രയിച്ചു. ട്രെയിൻ വൈകുമെന്നറിഞ്ഞ റെയില്‍വേ അധികൃതർ സ്‌ഥിരം യാത്രക്കാരുടെ പ്രശ്നം പരിഹരിക്കാൻ ചെന്നൈ-ആലപ്പുഴ എക്‌സ്പ്രസ് പാസഞ്ചര്‍പോലെ ഓടാന്‍ അനുമതി നല്‍കുകയായിരുന്നു. 9.35നാണ് എക്‌സ്പ്രസ് ആലുവ സ്‌റ്റേഷനിലെത്തിയത്. ഗുരുവായൂര്‍-എറണാകുളം പാസഞ്ചര്‍ ട്രെയിൻ നിർത്തുന്ന എല്ലാ സ്‌റ്റേഷനിലും നിർത്തിയാണ് ചെന്നൈ-ആലപ്പുഴ എക്‌സ്പ്രസ് സർവിസ് നടത്തിയത്.