സ്കൂൾ വാഹനങ്ങളിൽ മിന്നൽ പരിശോധന; 23 വാഹനങ്ങൾക്ക് സ്​റ്റോപ്​ മെമ്മോ

പറവൂർ: ജോയൻറ് ആർ.ടി.ഒ ഓഫിസി​െൻറ അധികാര പരിധിയിൽ വരുന്ന പ്രദേശങ്ങളിലെ സ്കൂൾ ബസുകളിൽ മോട്ടോർ വാഹന വകുപ്പ് മിന്നൽ പരിശോധന നടത്തി. 25 സ്കൂളുകളുടെ പരിസരത്തായിരുന്നു പരിശോധന. സേഫ്റ്റി സ്റ്റിക്കർ പതിക്കാത്ത 23 വാഹനങ്ങൾക്ക് സ്റ്റോപ് മെമ്മോ നൽകുകയും കുട്ടികളെ കൊണ്ടുപോകുന്നതിന് വിലക്ക് ഏർപ്പെടുത്തുകയും ചെയ്തു. സ്കൂൾ തുറക്കുന്നതിന് മുന്നോടിയായി കഴിഞ്ഞ ദിവസം പറവൂരിലെ എല്ലാ സ്കൂൾ വാഹനങ്ങളും സുരക്ഷ പരിശോധനക്ക് ഹാജരാക്കണമെന്ന് ആവശ്യപ്പെട്ടിരുന്നു. സുരക്ഷ മാനദണ്ഡങ്ങൾ പാലിച്ച വിദ്യാഭ്യാസ സ്ഥാപനങ്ങളിലെ എല്ലാ ബസുകളിലും സേഫ്റ്റി സ്റ്റിക്കർ പതിച്ചിരുന്നു. ഹാജരായ ഡ്രൈവർമാർക്കും ഡോർ അറ്റൻഡർമാർക്കും ബോധവത്കരണവും നൽകിയിരുന്നു. പരിശോധനക്ക് ഹാജരാക്കാതെയും സേഫ്റ്റി സ്റ്റിക്കർ പതിക്കാതെയും ഒാടുന്ന സ്കൂൾ വാഹനങ്ങൾ കണ്ടെത്താനാണ് ബുധനാഴ്ച പരിശോധന നടത്തിയത്. ഇത്തരം വാഹനങ്ങൾ പരിശോധനക്ക് ഹാജരാക്കുന്ന മുറക്ക് സ്റ്റിക്കർ വിതരണം ചെയ്യുമെന്ന് ജോയൻറ് ആർ.ടി.ഒ ബിജു ജയിംസ് അറിയിച്ചു. പരിശോധനയിൽ മോട്ടോർ വെഹിക്കിൾ ഇൻസ്പെക്ടർമാരായ സലീം വിജയകുമാർ, ഷോയ് വർഗീസ്, അസി. മോട്ടോർ വെഹിക്കിൾ ഇൻസ്പെക്ടർമാരായ ജോസഫ് ചെറിയാൻ, മിൽജു തോമസ് എന്നിവർ പങ്കെടുത്തു. സ്കൂൾ അധികൃതരുടെ പേരിലല്ലാതെയുള്ള വാഹനങ്ങളിൽ കുട്ടികളെ സ്കൂളുകളിലേക്ക് കൊണ്ടുവരുന്നുണ്ടെങ്കിൽ വിവരം നിർദിഷ്ട ഫോറത്തിൽ സ്കൂൾ അധികൃതർ ഈമാസം 10ന് മുമ്പായി ആർ.ടി.ഒ ഓഫിസിൽ ഹാജരാക്കണം.